為食Wing Wing

Wing Wing自出世以來，食方面一直都不用媽媽擔心，BB時飲奶肯飲，亦算飲得快，大個D仲愛上飲奶奶，到佢開始食大人飯餸之後，我哋只俾早晚兩餐奶佢飲，佢都飲到津津有味，仲好似好唔夠喉咁。到咗而家佢返學，學校有早餐，而媽媽又想慢慢同佢戒埋夜片，所以都少咗俾奶佢飲，變咗好多時早晚都無得飲，但Wing Wing亦無因為咁而扭計，哈，點解?? 因為佢搵到人間美食囉......佢開始食大人嘢之後，好多嘢都想試，為食到飛起，見人哋食咩就話要咩，最攪笑有次媽媽同佢一齊去街，經過超級市場，佢見前面有個姐姐正準備行入去超級市場，

就問媽媽﹕個姐姐去邊呀?

媽媽﹕姐姐去買嘢囉!

Wing Wing: 姐姐買咩食架....(哈!唔係問買咩嘢，而係問買咩食...攪笑!)

哈!為食Wing，正係掛住買嘢食......

佢食飯基本上都唔洗媽媽操心(只間中扭計唔肯食，不過對呢隻為食貓嚟講，次數真係好少!)佢食一餐飯都算快，又唔洗媽媽左氹右氹，都算係咁咯，亦肯自己用筷子或者匙羹食，Wing Wing好多嘢鍾意食，真係數都數唔哂，魚、蝦、粉絲、麵麵、粉粉、肉(咩肉都食、真係驚佢肚餓會食咗自己....

)、至於零食方面，媽媽一直都唔多俾佢食，但自從無請工人之後，亞女分別由學校、公公、婆婆、爺爺、嫲嫲幫手湊，一人俾d嘢佢食吓，試吓，亞女就得享人間美食喇，知道呢個世界上除咗飯同奶奶之外，仲有好多好嘢食，佢亦同其他小朋友一樣，見到d未食過嘅嘢食就要試，貪得意、貪新鮮，只要唔過量，媽媽都由得佢試，不過有一樣都要讚吓佢嘅，就係當佢食完一樣嘢又想食嘅時候，只要同佢講﹕嗱!食完呢件就無架喇，要講Bye Bye架喇!佢都好合作，好滿足咁食完之後都肯講Bye Bye

!(其實用<講Bye Bye>呢招都幾好架，起碼佢知道講完Bye Bye 就唔會再同件嘢食有任何瓜葛，哈!)唔會話繼續咁扭，不過就真係下下同佢講道理囉，唉!算係咁咯，肯聽你講理，都要讚一讚，哈! 不過個為食樣就繼續keep住，見到佢真係好好笑!