今日媽咪放假，打算帶亞女去行街街，因為諗諗吓，亞女下個禮拜就開始佢返學嘅生涯喇，所以媽咪好想趁呢幾日帶亞女去吓街、最好去遠ｄ行吓、玩吓，皆因第時就會無咩機會平日去街街咯！
咁媽咪就同亞女著靚靚喇！媽咪見亞女著得咁靚，又好想同佢影吓相先出門口，點知一叫佢擺post就表情多多、攪笑！郁嚟郁去攪到張張都朦朦哋，好不容易先影到呢張企定定嘅相，但係......又好似古靈精怪果ｄ樣可愛ｄ喎！呢張好似正經得滯！
＊＊＊
我哋去咗西九龍中心行咗陣、玩咗陣，果度都有間冒險樂園，入面仲有個波波池忝，但一諗起７月頭嘅可怕經歷就真係咪攪喇，所以都只係逛咗陣就走喇！
尋日Daddy、媽咪帶埋Wing Wing又去咗契媽果度游水水，今次契妹無瞓覺，媽咪諗住終於可以同亞女、契妹影合照，點知Wing Wing響度玩嘢，係要走嚟走去，唔肯企響BB隔離，影得最好算係呢張喇....
****
今次亞女自己穿住個水泡游得耐咗d、遠咗d，比上次確有進步，希望真係一次好過一次啦!
****
之後Daddy提議去朗毫坊食飯，於是又去咗果度行吓喇!
******
可能游完水，今晚亞女瞓得好好，可能佢都好攰喇!不過Daddy︴媽咪都......一樣啦!
一首媽媽近日才認真細看歌詞的歌，很輕快、很好聽!
生命有價
曲：歐碪江 詞：歐碪江 編：張兆鴻 唱﹕王馨平
盡快將， 憂愁眼睛， 憂愁面孔， 憂愁內心， 拋棄吧。
找回你的微笑嘴巴， 一同合唱， 可以嗎？
啦啦啦啦，啦拉啦拉， 啦啦啦啦啦啦啦
一同拍掌全力讚賞生存是有價。
從哇哇一聲睜開眼睛看地球， 從懂得緊握媽媽暖的手。
到依依呀呀一聲兩聲仍唔夠， 從爬爬行行然後曉得走。
從叻起書包， 吸取知識不用愁, 從你有佢有開始手牽手。
到它朝開心， 傷心痛心齊嘗透, 人活著實在奇妙怎猜透。
願你知生命實在亦是有些意外， 不用徬徨迷途只須緊記。
它有無窮色彩， 它有無盡的愛, 願憑著自信垮過障礙賽。
媽咪一位好朋友26號生日，所以就約埋三兩知己一齊聚吓、慶祝吓。諗諗吓，而家人大咗，各有各忙，有ｄ有家庭、有ｄ有埋細路，想好似讀書果陣成日見都幾難，所以每逢有人生日，我哋都盡量約吓出嚟，媽媽雖然有隻樹熊仔跟住，不過媽媽都好珍惜一班朋友約出嚟嘅機會架，出到我一定出，所以今日媽咪就帶埋隻樹熊仔去其中一個朋友仔屋企喇！遠就遠ｄ，不過媽媽當帶亞女去街街，去唔同地方行吓，無所謂，幾遠都唔怕！
唔知各位有無蒸過水蛋呢？你哋又蒸得靚唔靚呢？小妹６月開始報咗個烹飪班，亞Sir教開蒸蟹果陣順便講過吓點樣蒸蛋先至最靚、最滑，我一直都好少煮飯，但今日我終於的起心肝走去試吓，嘩！用亞Sir教嘅方法蒸完真係好靚、仲好滑忝，真係好似燉蛋咁滑！大家想唔想學呢......好！就教吓各位Blog友啦﹕
首先要知道蛋同水嘅比例--係蛋(1):水(1.5)，水仲要係熱滾水（先在水中放鹽）
跟住發蛋，發到咁上吓就邊攪勻邊慢慢落滾水，你會發覺有好多泡，再片起ｄ泡就啱喇！
跟住攞去蒸７分鐘，記得係７分鐘，蒸完蓋住鑊蓋焗佢一陣（約１至２分鐘啦）
咁就得架喇！（食之前你鍾意可以落ｄ豉油）各位不訪試吓啦！但記得試完要返嚟講我知成唔成功呀！等你哋回應喇！
今日媽媽帶埋Wing Wing去探契媽、契妹，仲帶埋泳衣諗住去果度個club house游水水忝，亞女好興奮，只掛住游水水，我哋去到契妹瞓咗覺，媽咪同契媽傾吓計，晏晝就起行去游水水喇！
個泳池好大好靚，咁啱又有ｄ大約兩、三歲嘅小朋友響度，於是大家好自然又一齊玩水水喇！今次亞女都有新突破﹕就係戴潛鏡將個頭浸埋落水喇！哈！同佢玩咗幾次，佢鍾意戴潛鏡但又怕潛落水，見佢又興奮又驚，好攪笑，不過都飲咗幾啖水架，但總算係一個新嘗試，下次可能會無咁驚啩...另外亞女自己穿住水泡開始肯唔捉實媽媽手，自己兩隻手撥吓撥吓咁游，而媽媽企響佢後面捉住佢隻腳郁吓郁吓都ok，無喊，亦係另一個新嘗試。
Wing Wing加油呀，游水水真係好好玩架！
點解笑死媽媽？
哈！事緣今日Daddy打電話番嚟屋企同媽媽傾咗陣，點知Wing Wing都想講，OK，就俾佢同Daddy傾咗幾句，臨收線媽咪教Wing Wing同Daddy講﹕俾心機做嘢喇！亞女照講，跟住就收咗線喇！之後無幾耐，
亞女就問媽媽﹕俾心機Wing Wing睇吓啦！Wing Wing想睇吓呀！媽媽聽得唔太清楚，
於是再問﹕你想睇咩呀？
亞女就話﹕睇心機呀！Wing Wing想睇心機呀！俾我睇吓啦！媽媽聽完真係覺得好攪笑，再同佢講﹕心機唔係睇架，唔係一樣物件嚟架！
Wing Wing﹕俾我睇吓啦！抱我睇吓心機先啦！（要媽媽抱佢高ｄ去搵，個樣好似好期望抱高ｄ會睇到心機咁.....）
媽媽見佢仲未明，再同佢解釋一吓﹕叫Daddy俾心機即係叫Daddy加油、努力ｄ呀，無得睇架，明唔明白？....（下刪數十字......）
講完之後亞女好似明明哋咁無再扭喇！
＊＊＊
有ｄ嘢大人以為好深、好難就唔同小朋友講，但我卻會照講，佢收到幾多我哋唔知架，佢哋求知慾強都係好事嚟嘅！各位Daddy、Mammy俾ｄ耐性對你哋嘅小寶寶呀！
俾心機喇！
星期六亞女學校有個入學前嘅簡介會，媽媽帶埋Wing Wing去（因今日得媽媽湊佢），學校都好好，有班老師負責帶ｄ小朋友入個活動室度玩，等ｄ家長可以專心聽，個老師一帶開亞女果陣，我就留意住亞女個表情，驚佢唔肯跟人，點知又ｏｋ喎，入咗班房又無喊喎，於是媽媽就可以專心聽校長講解入學嘅細節喇！其間有好幾個小朋友都喊到七彩咁，係都要搵亞媽，唔肯入班房......(諗諗吓，亞女之前咪就係咁囉，唔肯跟人、只跟工人、媽咪，成日喊、勁痴身，但不太記得從何時開始，亞女有好大進步，唔怕醜、肯跟人、就算響陌生人面前都會大聲唱歌、跳舞呀咁，真犀利！)到咗個簡介會完果陣，我去裝吓佢，見佢真係無喊，同其他小朋友一齊玩，媽媽走入去，ｄ老師即刻讚佢好乖，自己玩、自己睇書書，仲去咗一次尿尿忝，媽咪都好安慰，心裏面覺得Wing Wing可以獨立喇，就算第日返學無媽媽響身邊都應該唔難適應嘅。亞女，你好叻，媽媽以你為榮！
今日派書包，亞女返到屋企急不及待話要試，你睇佢......真係好興奮架！
Wing Wing仲話好鍾意返學忝，希望第一日返學果陣唔好喊啦！
，下次你返嚟再請你飲茶！