各位Blog友(吞吞、博博、麼麼、Na Na 、津津、Crystal、Swing、陽陽、曈曈.........仲有.....您呀!)
聖誕節有無興趣約出嚟一齊玩呀?
都係諗住先去d大d嘅公園或商場玩，然後再去食飯(再加插交換禮物)，仲可以有其他提議架!
因為我要輪班，所以暫有以下日子OK，快d回應報名啦!好想見吓您哋呀!
(1) 22/12 下午 至晚(大約11點至5點左右）
(2) 23/12 下午至晚
(3) 24/12 上午至下午
(4) 25/12 黃昏至晚
(5) 27/12 上午至下午
地點待定(有咩提議?唔一定要就我揀港島區架!)
你哋邊一日得都寫埋俾我啦，最多人揀果日就定果日啦!
預祝各位聖誕快樂，一齊玩得開開心心!
之前帶亞女出街，佢知道一去街媽媽就唔抱，肯自己行，就算間中扭吓抱都有個時間或者距離，例如同佢講抱到邊度邊度就唔抱喇，佢都明亦做得到，但近呢幾日帶佢出街係都要扭抱，初初Daddy媽咪以為因為佢近日病緊，可能係唔舒服扭吓計，我哋都心軟會抱吓，諗住遲d佢好番d先再同佢講數，點知而家藥都食完喇，帶佢出街依然係咁扭抱，仲耍係勁扭果隻，點氹點鬧都無用，真係俾佢激死，媽媽又唔想佢成日喊(因佢未好得哂，一喊又聲沙又鼻水長流咁)都唔知點好，同佢講理都講到我喉嚨痛，Daddy仲唔好老脾，氹又唔係鬧又唔係，真係火都嚟埋!
除咗呢樣，亞女響屋企都一樣扭，咩都扭，一有d咩唔合佢心意就忟憎，d笑容都唔知去哂邊，係咁喊係咁喊......唉!對住佢，真係少d氣都唔得!點算!
衰就衰在Wing Wing響屋企同學校完全係兩個樣，響學校超乖、唔喊、唔扭計、得人鍾意及稱讚，攞命.....擺到明係蝦Daddy媽咪，連爺爺嫲嫲、公公婆婆都係咁講!
你哋話我可以點........不如戴個面具扮劉老師算吧啦!
Wing Wing尋晚半夜仍處於100度與101之間，同日間嘅退燒狀態完全好似兩回事咁，衰就衰在亞女唔肯食退燒藥，所以唯有同佢貼張退熱貼。最終成晚都係瞓吓醒吓又喊吓咁，到天朦光先瞓得好ｄ。
今早即係同佢睇返一直睇開果個家庭醫生，佢開果ｄ藥亞女算鍾意食，加上每次個醫生都送貼紙俾佢，哈！亞女對佢嘅印象可能會好ｄ啩，希望今次肯乖乖食藥啦！
小朋友發燒，家長最擔心就係半夜ｄ時間，半夜小朋友體溫係會熱ｄ，好似亞女咁，尋晚又係keep住100至 102度之間，個人好熱，媽媽只有同佢抹身、貼退熱貼同埋開ｄ冷氣，唉，夜媽媽亞女唔肯飲水，只係想瞓覺，唯有等佢好好哋瞓一覺啦！
今朝起身已經好ｄ，Wing Wing仍然好精神，不過佢食緊藥，所以都要向學校請假，原本媽媽今日返晏，無計，都要同老細請半日大假睇住Wing Wing，但亞女呢次唔係好肯食藥，今朝次藥真係難餵，又要玩又要氹，最後都係要加落ｄ維他奶到先肯飲，Daddy媽咪估計係佢今次ｄ藥難飲咗，因為亞女飲緊嘅時候，都不停咁嗌好辣，估計係太哽！
到咗第二次藥，亞女連用奶送藥都唔肯，又無胃口食飯，真係攪到媽媽都無哂計，只用盡所有嘅方法去氹佢同鬧佢，真惡攪，唉......
只希望佢快快好番就好咯！Leave it to God!
Daddy有個朋友響Disney舉行婚禮，尋日就帶埋Wing Wing豬去喇，可以見識吓麻，不過可惜媽媽要返工去唔到，只託Daddy緊記影ｄ相返嚟俾媽媽睇吓！
誰知之前果晚，不幸地亞女開始發燒，媽媽不敢怠慢快ｄ俾退燒藥佢食，同埋貼住張退熱貼瞓覺，佢半夜都退咗燒，媽媽先安心ｄ，但朝早起身都係燒吓退吓咁，不過亞女都好精神，同平時無咩分別，咁Daddy同佢返完教會都照原定計劃去Disney觀禮！
聽Daddy講，婚禮場地有ｄ類近黃金海岸嘅feel，不過好奇怪--竟然係無Mickey同Minnie嘅，真係無諗過喎，等我仲同亞女講有得睇Mickey忝！
之後亞女繼續維持低燒狀態，所以Daddy都急急腳帶亞女睇醫生先喇，返到屋企食完藥就噯佢瞓，希望快ｄ好啦！
笑料（一）
事緣有一晚媽媽坐響梳化度想休息吓、睇吓電視，而亞女就好乖咁自己玩，佢真係咩都可以玩一餐，不過當然最想媽咪陪佢玩啦，但當日媽媽無咩精神，真係好想抖抖........無幾耐，亞女無端端自己原地跳，係咁跳、係咁跳，跟住同媽媽講﹕媽咪，你叫Wing Wing唔好跳啦......
......哈！媽咪照佢意思咁講﹕Wing Wing唔好跳啦！跟住佢先停............笑死我！（如果我唔叫佢停唔知佢會跳幾耐呢？
）之後佢繼續要我陪佢玩叫名遊戲，首先佢自己企得遠遠咁，跟住同我講﹕媽咪，你叫Wing Wing跑過嚟啦！媽媽照講﹕Wing Wing你跑過嚟啦！佢就照做。之後又講﹕媽咪，你叫Wing Wing唔好跑啦，要慢慢行架............哈！真俾佢激死，神又係佢鬼又係佢，攪笑！
笑料（二）
有晚媽媽帶Wing Wing去playroom玩，同佢著好鞋襪，去到佢亦玩得好開心，點知玩玩吓可能見到有ｄ小朋友無著襪都可以玩，於是佢就想除襪喇，但媽媽之前已同佢沖咗涼，所以唔想佢除襪玩，於是媽媽即管同佢講﹕不如繼續著住襪玩啦！點知亞女邊除襪邊話﹕我唔係除襪，我驚對襪會唔見，所以收埋先（跟住就自己攞住對襪收埋響媽媽個袋度喇！)........哈！真係咩藉口都諗到......
笑料（三）
媽媽膝上有一圓圓形狀的胎誌，昨天跟Wing Wing沖涼後正要替她穿衣時給她看見（其實以前她也有看到的，但可能不以為意吧！）便指着問媽媽﹕媽咪，點解你有個圓圈響度嘅？媽媽回答﹕係呀，呢ｄ叫胎誌，媽媽有一個胎誌響度架。跟住Wing Wing搵吓自己隻腳，給她找到剛弄到的瘀傷，興奮地對着媽媽說﹕媽咪，我都有個圓圈呀！ 哈！笑死我.......
返完主日學之後，Daddy約咗ｄ朋友，所以就只有媽媽帶Wing Wing去行街街喇！始終媽媽放假都係鍾意帶亞女出吓街，辛苦ｄ就辛苦ｄ啦！
我哋去咗行新世紀，果度有個大大公園，小朋友就最啱玩喇！
Wing Wing排隊等咩？
咪就係等打韆鞦囉，只得兩個位乍！（不過亞女都好有耐性咁自己排隊。
之後又玩吓呢個氹氹轉喇！ｄ哥哥姐姐都有就吓佢轉慢ｄ，亞女都無上次玩咁驚喇！
玩玩吓仲學人坐底忝！
又玩吊橋跳跳跳！
哈哈！亞女邊有咁高呀，好似啱啱過90cm之麻！
之後食吓嘢再行多陣就返屋企喇，全程亞女都算乖，不過就要媽媽不斷用把口提住佢囉，無計，佢咩都鍾意攪吓、玩吓，唔叫住佢又唔得，又要同佢講道理、解釋一番，攪到我脆弱嘅喉嚨又開始痛喇！睇怕又要睇醫生喇！
07年11月10日
今日第一次參加亞女間學校嘅秋季旅行，Daddy媽咪都特登攞假出席，好想同亞女一齊參加學校嘅活動。
＊＊＊＊＊＊
8:30am返學校集合，難得可以入吓亞女個班房，媽咪竟然有ｄ興奮，仲話要影番張相留念忝！（哈！估唔到第一個境點竟然係......班房）
＊＊＊＊＊＊
去到今日個目的地喇---大棠荔枝山莊，Wing Wing仲同幾個同學仔手拖手忝，不過攪笑嘅係佢唔係個個肯拖，有個叫極佢都唔係俾人拖，真巴閉！
玩集體遊戲果陣好曬、好熱，亞女都無咩心機玩，只係揸住老師所送嘅扇企響度、或者行吓、坐吓咁......反而ｄ家長們、老師們落力ｄ囉！（哈！梗係啦！想快ｄ玩完跟住開餐麻！）
呢位就係亞女人生第一個班主任喇，好好人嘅劉老師！
......不過真係好可惜......劉老師有佢嘅原因唔做喇......
......媽媽都好鍾意呢位老師，佢好親切、好識氹小朋友同埋好好記性，媽咪都好唔捨得佢，今日亦專誠邀請佢同亞女合照一幅以作紀念！
希望新嚟嘅老師都一樣咁好啦！
＊＊＊＊＊＊＊
食完飯我哋再四周行吓........睇馬馬啦、駝鳥啦、豬豬啦、玩繩網啦、吊橋啦等等，聽落好似好多嘢玩咁，但係去過嘅朋友就知其實.......呢度真係無咩玩同埋真係幾殘舊，不過就勝咗地方細細、唔怕小朋友走失囉，所以都有好多學校鍾意嚟架！
睇個車輪就知Wing Wing無咁叻揸架車車載幾位哥哥姐姐啦！哈！只純粹影吓相者！
亞女就最鍾意玩呢架好似水車嘅東西，不停踩踩踩，幾開心！
＊＊＊＊＊＊
回程亞女例牌zzzZZ，而Daddy媽咪就同坐響隔離嘅劉老師傾吓計喇，講吓亞女平日響學校嘅表現，老師都讚Wing Wing幾叻女，最鍾意就係唱歌，食嘢唔洗人餵、又無揀嘢食，食嘢仲開始整潔咗，媽媽聽到都幾開心，不過亦有同老師講佢響屋企就會蝦媽咪，成日扭計，同學校真係兩個樣，老師都話呢個歲數係自我一ｄ、大個ｄ會好ｄ嘅......媽媽仲問咗劉老師一段平日響學校講故事之前會唱嘅一首歌仔係點唱？（皆因亞女成日唱，但媽媽就聽到ｄ聽唔到ｄ咁，所以最好都係趁機問一問）哈！唔問由自可、一問就笑死我....
平日亞女唱（應該話平日我哋聽到亞女咁唱先啱）﹕小小故事、多多故事，劉老師講你知.....有趣嘅故事、驚驚嘅故事、晴朗嘅故事，劉老師講你知！
但真相原來係﹕說說故事、聽聽故事，劉老師講你知！有趣嘅故事、經典嘅故事、名人嘅故事，而家講你知......
哈！等媽媽成日以為點解學校會講ｄ驚驚嚇人嘅故事呢.....原來如此！
返到西環我哋見亞女仲瞓緊就搵咗間茶餐廳嘆番個tea先，之後就返屋企齊齊zzzZZ！
總結今日行程都算順順利利，亞女亦可以有機會接觸吓大自然，都係好事，Wing Wing，放心，下年有機會Daddy媽媽都會繼續陪你玩嘅！
真俾佢激死！......（不過都好，起碼知道亞女學識咳啖麻！）
