11-9 好感動！

今日媽媽湊Wing Wing放學果陣，專登攞支利賓納俾響附近開工嘅公公飲（公公正式投入舊屋翻新之工程喇）亞女仲同公公講﹕公公，俾你飲架，俾心機做嘢呀！令公公都好感動！

＊＊＊＊＊＊

因今晚媽媽返夜，所以響Daddy未放工嘅時候，媽媽就帶埋Wing Wing去爺爺度喇！我哋仲攞埋媽媽煲嘅靚湯去忝，爺爺亦好感動，仲大讚媽媽靚湯好飲，攪到媽媽鬼咁開心！

之後媽媽見時間差唔多，就同亞女講﹕媽媽要返工做嘢喇，Wing Wing等Daddy嚟接你喇！亞女一聽，隨即就貶貶咀，少少想喊嘅口吻話﹕唔好走啦，同Wing Wing玩啦！媽媽問﹕咁玩幾耐呀？Wing Wing就答﹕玩多一陣！媽媽同佢講﹕好，媽媽同你玩多一陣，跟住Wing Wing要乖乖等Daddy喇，佢話好，咁媽媽就同佢玩多咗一陣喇！之後媽媽話走，佢都無扭計，好似同佢玩多咗一陣之後真係安心ｄ，仲用哂大人講嘢嘅口吻話﹕媽咪小心喇，唔好整親呀，俾心機喇！哈！媽媽聽完亦好感動！連爺爺聽到都有ｄ意外佢會咁講，大讚Wing Wing好乖！媽媽突然覺得Wing Wing好生性，真係好感動！