小雲同小吉好重要!: 7月 2008

2008年7月31日星期四

有改善

話說上星期三第一次帶亞女去參加明愛攪嘅暑期跳舞班，激c我之後，星期五去開果度，我就忍唔住填咗張意見表，諗住反應吓d意見，唔想亞女跟唔上咁玩落去....

我主要係講番

1. d音樂太細聲，好似無咩氣氛咁

2. 只得一個老師教咁太人，場面好似難控制，如果多一位助教可能會好d

3. 個老師跳嘅舞蹈太深，唔多適合3-5歲嘅小朋友

到咗尋日(30-7)再帶亞女去上第二堂，都抱住再試吓嘅心態(真係有諗過唔再玩，因亞女同表哥仔都表示好深、唔識跳)，不過好明顯見佢哋有落過功夫想改善﹕

1. 見到個大d嘅擴音器放在響地下

2. 個老師俾多咗d心機同用方法去教班小朋友，亦見到班小朋友專心咗(亞女亦集中咗)

3. 最攪笑就係跳跳吓真係有一個助教走入嚟幫吓手，見佢唔似跳開舞，應該係明愛d staff 嚟，佢哋真係接受意見，盡量改善，心裡面都有少少感動.....

不過臨尾(差15mins落堂)嘅時候，突然又走多幾個義工出嚟，企響d小朋友隔離幫手教，又有一個staff同我哋講話要我哋出去門外等，話地方唔夠，我見有個工人同佢講話﹕應該一開始上堂就講明，有咩理由臨落堂先嚟講.......我都認同，亞女跳得好地地，我無端端咁俾佢哋請咗出去，佢實喊，我都有同個staff講，不過佢依然話家長要出去等，佢哋會攪得掂......結果亞女真係喊，我心諗﹕梗係啦，跳到一半唔見哂班家長，咩安全感都無啦!.....

咁嘅做法真係不敢恭維，唔通又要寫張意見表反映意見.....

2008年7月29日星期二

玩得太遲??

近日開始join Facebook(人哋已經玩咗好耐嘅嘢，我最近先玩，是否太遲?)可以搵番無見好耐嘅朋友仔、中學同學，睇吓佢哋d相、傾吓計，都不失為一個好渠道，可以互相慰問一吓，不過自己始終唔會寫太多嘢，最多都係upload吓亞女d相咁，反而愛八卦吓人哋嘅空間......

哈哈，我...始終都係鍾意寫Blog!

2008年7月27日星期日

三表一齊去沙灘

7月26日

好開心，一早約好姨媽今日齊齊去沙灘玩，天氣好、大家又無傷風感冒，最好時候，出發前同三位小可愛影番張相先!

我哋先去姨媽屋企，然後一齊搭的去淺水灣，三位小朋友都好聽話，叫佢哋上車要瞓吓覺先，等去到可以盡情玩，佢哋真係做得到，仲一落車就起身，時間啱啱好，抵讚!去到都成3點幾，但依然超曬，好彩預咗會落水玩，如果只玩沙沙，肯定熱c.....

呢兩張相好攪笑，齊齊見到直升機，齊齊指住齊齊叫(真可愛!)

表弟DD唔肯落水，唯有同表哥仔去玩水先啦!

自從去多咗泳池之後，亞女已經鍾意咗游水，仲可以唔洗人扶住自己用水泡游忝!有進步!

哈哈!臨走前媽咪決定邊同DD唱歌歌邊抱住佢落水，哈!成功!

不過一見亞媽就........樹熊再現!

*******************************************

今日都玩得好開心，去沙灘可以玩沙，又可以影靚相，小朋友又興奮，真不失為一個好節目!

下次有機會一定要再去玩過!

2008年7月25日星期五

表情多多

好鍾意見到亞女表情多多個樣，忍唔住又去攞部相機影低佢~

是晚去游水，亞女變身後繼續古靈精怪!

推介﹕有樣學樣滿天星

力行劇社於8月21日至24日，西灣河文娛中心劇院上演六場三代同歡音樂劇 -

＜有樣學樣滿天星＞。由陳敏兒、廖啟智帶領一班小朋友演出。門票現正在各大城市電腦售票網公開發售。

http://www.bestreben.org.hk

誠意推介，適合一家大細去睇!

珍惜

7月24日

今晚約咗好幾位中學同學出嚟食飯(參加慶祝其中一人生日)，最初有6個話可以嚟，點知電話一個一個咁收，一個一個咁話唔得、唔得，心裡面真係有d唔開心，仲記得以前都試過有呢d情形出現，自己仲係負責做約果個，約到自己都忟哂，果時仲話俾自己聽以後咪攪我，打死都唔再約(人哋約到先出).....

但係人大咗，會愈記掛昔日嘅老友記，唔想就咁就各有各，於是間中我都約吓人食飯，只願大家都有我呢個心意........

今次我仲同其餘有小朋友的講明，唔帶仔女，只想敘舊，傾吓計(因一有小朋友在場就真係難傾密計d)，誰知最終出席的只有一半........

Anyway，少人有少人咁傾，都好enjoy，自己亦要學吓放鬆，而家都市人返工真係好多嘢做，OT都好平常，唔可以因此就忟憎，要同自己講﹕下次會更好!

2008年7月24日星期四

一日假

23/7

今日要帶亞女去新學校做校服、晏晝又會去玩暑期跳舞班，所以今日同亞女請咗一日假。

尋晚姨媽通知話表哥仔可以同Wing Wing讀埋同一間學校喇，St. James已經正式收咗佢喇，大家都好興奮，亞女亦好開心，今日仲一約埋一齊去做校服忝，可以兩表兄妹一齊讀書真開心。

而晏晝個跳舞班亦係一齊上嘅，佢哋兩個一去到都好興奮，不過開始嘅時候亞女仍然唔多慣，而且個Miss教得好快、d舞步一d都唔淺，對一個3歲嘅小朋友嚟講好似難咗d，亞女跟吓跟吓都無心機跟，成日擰轉頭望住我話﹕我唔識跳呀!而表哥仔開頭都有跟住跳，跳跳吓又係無咩耐性，攪吓呢樣又攪吓果樣，相互影響下，亞女同表哥仔就齊齊自己玩，完全唔跟個老師，攪到我好尷尬，都唔知可以做d咩，而個Miss......好似完全唔識Handle呢種情況咁，自己有自己教，d小朋友跟到就跟，跟唔到佢都只係講多一次就算，成班有10多人，唉，教得幾多個呢，連助教都無.....個Miss又好似無咩教小朋友嘅經驗咁，好似用咗教大人嘅方法去教呢班小朋友咁......唉.......

呢件事媽媽除咗對個Miss有d失望之外，亦開始擔心一樣嘢，就係兩表兄妹一齊返學讀書係咪真係好?有好嘅影響當然好，但玩得癲得滯都幾愁，好似今日咁，佢哋一拼埋就好癲，表哥仔做咩佢又跟住做、跟住玩，相反，亞女唔想跳舞又會影響表哥仔唔想跳，咁樣互相影響下真係唔知係好定係唔好喇........

總之去完呢個跳舞班媽媽心情真係麻麻囉，興致勃勃咁去，換嚟唔多開心咁.....

於是等亞女瞓完晏覺就同咗佢一齊去游水喇(希望玩吓水開心d啦!)我哋6點幾先去，而家泳池免費，都預咗會多人，但係估唔到真係咁人頭湧湧，好彩我哋只係去玩吓水、游兩游者，不過見亞女今次玩得好開心，亦唔太驚水，都係一個好玩意，嚟緊都會多d帶亞女去游水水。

2008年7月19日星期六

笑話

(一)

有一日，Daddy、媽咪同Wing Wing一齊響屋企食早餐，都唔多記得Daddy拎住d咩

問媽咪﹕你食唔食呀?

媽咪答話﹕不 (用國語讀出)

亞女即刻就話﹕媽咪，blue即係藍色喎，你講咩呀........

媽咪見到亞女個樣懶醒咁，好攪笑，(又會咁留心聽我講嘢嘅.....)

(二)

有一日媽咪因為要幫手賣旗，所以勞煩婆婆睇住Wing Wing，亞女不嬲都好鍾意買旗嘅(可能一般嘅小朋友都鍾意)，媽咪仲應承會留一支旗俾佢，到媽咪做完嘢返嚟湊亞女果陣，亞女真係第一時間問媽咪有無旗(好彩記得留番支俾佢)，亞女好開心，攞住支旗就繼續自己玩，咁媽咪就執定嘢準備返屋企喇，點知媽咪摺緊亞女一條褲嘅時候，望到有一些啡啡紅紅咁色嘅污漬，就講笑咁同婆婆話﹕

媽﹕哈!你睇吓，亞女條褲有經期呀?

婆﹕吓，唔係啩，少少污漕乍啩.....

婆婆都未講完，亞女已經快快口咁話﹕

女﹕媽咪，俾我睇吓，睇吓邊度有支旗......

(笑到我同婆婆cc吓!)

(三)

有一晚，亞女揸住支筆係咁劃係咁劃，劃到要出街食飯都唔捨得放手，媽咪就勸佢話返嚟先再劃過....

媽﹕Wing Wing，我哋而家出去食飯喇，要著鞋、熄冷氣喇，返嚟再劃過啦，而家放低支筆先啦!知麻?

女﹕吓，咩話?(之前可能唔多留心媽咪講緊咩....)

媽﹕媽咪話快d擺好支筆呀。

女﹕媽咪，你講咩呀?

媽﹕我話叫你放好支筆先。

女﹕媽咪，你之前果句講咩呀，係咪話返嚟可以再劃過呀?

媽﹕係喇! (咁強調呢句呀，亞女.....)

2008年7月18日星期五

奉獻學習

相信神的人會相信現在擁有的不是靠自己能力可以得到，一齊都是有神的恩典，愛神的會學習十一奉獻(即將入息十份之一獻予教會)，上月不知怎的，拖吓拖吓，沒有十一奉獻，但心裡卻是記掛，至7月初，早早已作奉獻(希望養成良好習慣)，但心裡仍十五十六的想著﹕應否憑信心再多拿出十分一填補上月的呢? 但要在一個月騰出十份二的收入作奉獻的確不容易，但亦確確實實經歷過神及時的幫助，照理而言，憑信心擺上絕對可以看見神的作為，正當心裡仍是猶疑之際，聽道聽見神的提醒，當學習以神家為念，要先顧念神的國，其後必不致缺乏，神必眷顧。聽著聽著便踏上信心的功課，將一筆絕對緊要的金錢奉上，沒有這筆錢，甚至這月怎過也頭痛.......

但心裡卻是有著喜樂、信心及平安，相信神又會預備一次深刻的經歷給我們。

直至早幾天，一筆遺忘了的金額出現了，來得及時，只與我們早前奉獻的差二百蚊，幫助我們不致缺乏，亦讓我學習擺上的功課。人認為愈要給予就必會愈來愈少，但在神國，您只有愈願意付出才會愈多。更奇妙的就是今天那二百蚊出現了，正是沒有少，整體計算過後，原來還多出一點點，心裡頓時讚嘆神的作為，他真讓我經歷他的豐盛，Halleluya!