第二個課室

見到亞女每日放學返到屋企都好開心，自己同自己玩咗好多以前無嘅小玩意，仲玩得好開心、興奮，媽媽睇見心裏都好開心、好安慰！

佢響屋企做番好多應該響學校做過嘅嘢（媽媽自己估計），扮洗嘢啦、扮洗手啦、要媽媽叫佢個名先走埋嚟攞嘢啦、自己食飯啦、照顧別人啦，仲間中唱幾句響學校學嘅歌仔，又會講一ｄ響學校成日要講嘅說話﹕例如

老師講故事時間應該就有講以下呢句喇！（因我成日聽亞女講嘅）

小小故故事，多多故事，劉老師、吳老師講你知......

此外，亦發覺Wing Wing食飯之前多咗記得自己祈禱，有時佢都會話我知有為其他小朋友祈禱架﹕即係講多句﹕多謝天父，俾小朋友飲食......

最攪笑係佢扮大人個樣，早幾日同佢去公園玩果陣，當佢玩緊而媽媽正坐下歇一歇嘅時候，佢又走埋嚟坐響我身邊然後同我講﹕媽媽你去玩啦，Wing Wing坐係度睇住你啦！哈哈

真係俾佢笑死！

Wing Wing響屋企，就好似佢第二個課室咁，咩都鍾意做番一次俾媽咪睇，好似想將佢所有學過嘅嘢曬冷咁，哈！呢ｄ就係校園群體生活嘅收穫喇，希望亞女一直咁開開心心返學啦！