3月21日晚
呢晚返到屋企，發覺亞女D手指同腳有D一點點紅，個心即刻有D寒，因為好驚佢又嚟手足口
........
到咗22日朝早，見佢都係差唔多，又好似無咩點多到，於是就繼續觀察，呢日媽媽返晏，個心都係有D掛心......
到咗夜晚，Daddy見佢背脊都有紅點，開始懷疑唔係手足口而係出水痘，我哋即刻問咗個醫生朋友，佢問番D特徵都真係似水痘，都好，起碼唔係手足口先.....醫生話大約7至10日就會好番....計計吓都OK，趕得切亞女個生日會之前好番。
原本諗住今年唔攪生日會架喇，不過有一日諗起佢係4月4日生日，而今年佢又係4歲，幾特別，所以又想攪大D(哈哈，真係咩藉口都諗得到!)
今日(25日)佢D水痘都開始謝喇，Thanks God! 希望盡快好番啦!
3月20日
今日學校教師發展日，學生放假一天，Daddy媽咪亦放假，故齊齊外出去街街，俾亞女揀去花展定係鐵路博物館，個豬仔係都揀要睇火車，哈哈!我哋好有口齒嘅，就聽亞女話去遠D--大埔鐵路博物館
初初亞女唔敢行，仲拉住媽媽隻手叫我哋唔好行，佢話路軌係俾火車行嘅，經媽媽解釋呢度已經無火車行之後，佢先肯行吓俾我哋影吓相，哈，算佢有D安全意識啦!
個火車頭真係幾靚!可以見到以前嘅火車真係大開眼界!
齊齊扮睇風景~
之後再行埋大埔超級城，亞女一見到呢架直昇機就話要坐，媽咪見呢架直昇機可以有升有降，都幾特別，原都打算俾亞女玩，不過隻豬仔好攪笑，話唔要佢郁喎....哈哈!佢淨坐，媽咪可以慳番!
媽媽一連3日返P，每晚都放成10點，但亞女日日都要等埋我先肯瞓，可能佢鍾意媽媽同佢講故事啩!
第一晚媽媽問佢﹕
媽﹕Wing Wing，頭先媽咪打電話番嚟，咪同你講Daddy煮緊麵嘅時候，你自己睇吓兒童聖經嘅，你有無睇到呀？
女﹕有呀，睇咗啦！
（但媽媽見到本聖經位置唔多似被人翻閱過咁，於是問多佢幾次，佢先至講話其實無睇過......）
媽媽最怕人講大話，於是就教番Wing Wing唔可以講假嘅說話，應該講真話，仲一連幾晚都同佢講有關小朋友要誠實嘅故事......
（故事內容都係離不開大人叫小朋友唔好食咁多糖，但小朋友忍唔住食咗一粒，咁當媽媽問到嘅時候，應該點講呢??）
..........
媽﹕Wing Wing，咁你估噹噹點答媽咪？
女﹕無呀，無食呀.....咁囉！
媽﹕不過佢真係有食喎，點解你會咁講嘅?
女﹕因為驚媽咪鬧呀!
媽﹕但係我哋唔可以講大話架，要講真嘅說話架，如果噹噹講大話，媽咪就會好嬲，但係如果佢講真話，同媽咪講佢真係有食，對唔住呀，媽咪就會原諒佢喇，Wing Wing你都係呀，唔洗驚媽咪鬧架，只要你知道自己唔啱，媽咪係會原諒你嘅，不過就一定唔可以講大話，天父都唔鍾意人講大話架，知唔知呀?
女﹕知道!
........
如是者，呢個故事媽咪講咗幾晚，之後佢次次都識講真話，希望佢記住，做人一定要誠誠實實，唔好講大話。
傻豬仔笑話
(一)
有一日，Wing Wing同媽咪面對面傾傾吓計，亞女無端端用雙手摸住媽媽兩頰，然後就情深款款咁話
女﹕媽咪，你好靚呀!
媽﹕
(哈哈!冧哂!) Thank you!
跟住，亞女繼續望住媽咪，亦繼續摸住媽咪面頰......
女﹕媽咪，你好靚呀....
媽﹕
女﹕......副眼鏡!
媽﹕
(二)
一日，Daddy同媽咪傾緊計......
媽﹕Daddy，你可唔可以幫我睇睇個blog點樣backup呀?
Daddy﹕講到blog，你成日寫，你先至高手喎!
跟住，Wing Wing就插咀喇.....
女﹕吓!邊個係高班呀?高班即係K3班喎...邊個讀K3班呀?
媽﹕哈!豬仔呀，Daddy話高手呀，唔係高班呀.....
(三)
一日，亞女坐咗Daddy張有碌嘅櫈，媽媽就同佢講喇...
媽﹕Wing ，呢張櫈小朋友唔好坐呀，驚你搖吓搖吓跌咗落嚟呀!
女﹕咁呢張櫈係邊個坐架?
媽﹕Daddy囉，Daddy or Mummy!
女﹕吓!! Daddy 愛 Mummy?
媽媽聽完之後，同佢一齊笑咗一陣，跟住話﹕
媽﹕係呀係呀，Daddy愛媽咪呀!
(四)
有一晚，飯後媽媽帶Wing Wing落街行吓，佢見到前面有一間教會外牆有個十字架，十字架上面寫住主耶穌，就同媽媽講...
女﹕媽咪，上面寫住主耶穌呀!
媽﹕係喎，寫住主耶穌喎，你係咪認得呢個字呀?
女﹕係呀!
媽﹕Wing Wing，主耶穌住係邊到呀?(一直爸媽都告知她主耶穌喺我哋心入面，常與我哋同在嘅，媽媽咁問，係想睇吓佢記唔記得...)
女﹕住喺心入面囉!
媽﹕係呀!
(隔咗一陣......)
女﹕不過耶穌出世嘅時候係住喺馬槽架喎.....
媽﹕
