有番d精神~

亞女食咗好幾日藥，吽吽哋，今日總算有番d精神，不過呢個Wing Wing豬一精神番d就得戚喇，又問呢樣又問果樣，真係每事問，問到媽媽都覺得煩，另外亦因為食咗藥嘅關係，個人會攰d同埋多咗扭抱，胃口亦欠佳，見佢唔多肯食嘢，真係好掛住為為食食嘅為食Wing呀!

聽日會帶亞女返學喇，希望佢精精神神、快d好番啦!

一家人同遊迪士尼

2月26日

一早約定呢日一家人一齊去迪士尼，經費由公公婆婆保密基金贊助，哈哈，總之就唔洗我哋幾個做女嘅俾錢啦(....今次)

亞女仲未完全好番哂，不過見佢退咗燒，又唔想掃大家興，都戰戰兢兢咁帶埋佢去，感恩，佢都唔算扭計，不過胃口就差d囉!

 

 

Wing Wing行吓行吓都俾呢架遙控車吸引住!

亞女見DD有架私家車坐，又爭住話要坐，算啦，見佢食咗藥攰攰哋，就你一次咁多啦!

呢隻Micky係張學友與女兒的設計，媽咪鍾意佢夠colourful，睇落好精神!

難得佢哋肯玩埋一份扮太空人，夠哂投入，抵讚!

齊齊騎膊馬睇Show

不過我哋人多，小朋友又要去吓toilet，間中又坐吓、睇吓嘢，所以都唔係玩咗太多，亞女仲係驚d人扮卡通人物，所以最後都無同佢哋影相!

最後由基金出錢，一人一份禮物，亞女就揀咗佢最鍾意嘅tiger帽喇!好得意架!

好! 3月1號行山戴!

家長日

2月23日

今日媽咪Daddy一放工就去公公度睇吓亞女嘅情況，佢無嘔喇，不過仲有痾，且成日嗌肚痛，所以都諗住去完學校個家長會都去睇醫生喇~

佢嘅班主任叫余老師，好Nice，講番Wing Wing響學校嘅表現都大讚，話佢好主動答問題、好鍾意一齊唱歌、做運動，亦會關心身邊嘅同學仔，老師亦話佢好主動，有時仲會反問老師問題，真可愛! 而媽媽亦同老師講番佢響屋企嘅情況，其實大致都跟響學校嘅表現差唔多，不過就比響學校曳d，會多咗扭計，亦好識得蝦媽咪(唔知係咪叻過龍，激死!)攪到我有時都想將間學校搬返嚟屋企~

而媽媽亦好大膽咁提出平日Wing Wing扭計扭得過份時，我哋係會用獅子(公仔)嚟嚇佢，因佢好怕果隻公仔，(強調係佢太曳，講極都唔聽嘅時候先出呢招，平日嘅媽媽係同佢講道理嘅)，不過我亦知呢個唔係一個好方法，於是都請教吓亞余老師，佢都係建議我哋用Isolation嘅方法，俾佢坐開一邊冷靜，然後再同佢講道理.......唉，我哋都已經係咁做咯.....只係有時呢位小朋友太自我、太扭計者，不過媽咪亦會繼續學習，而且Daddy媽咪已經有共識，由今天起，就嘗試唔再提獅子，希望用另一些好d嘅教導方法去教佢，Wing Wing你要乖d喇，媽咪無哂絕招喇......

再睇亞女響學校嘅評估報告，都幾開心，Wing Wing好多嘢都識做，媽咪覺得佢都好叻叻，只希望佢唔好叻過龍、唔聽教就好喇。

亞女，繼續努力喇!

Love You!

家長日之前一天

聽日係亞女學校的家長日，Daddy、媽咪第一次以父母身份出席家長日，心情無話緊張與否，只是想藉此機會了解一下Wing Wing響學校嘅情況者......

今晚媽咪Daddy都要返overnight，所以唯有交俾公公睇住先，不過今晚亞女都有ｄ唔舒服，雖然都叫精神，不過成日嗌肚痛，又痾咗幾次爛爛，啱啱公公打嚟仲話佢嘔忝，都唔知佢咩事，真係有ｄ擔心.....）

仔女有病，爸媽唔響身邊，感覺真不好受，Wing Wing，你快ｄ好番啦！

打掃日

早幾日攰攰哋、個頭痛痛哋、心情又麻麻哋，又要返工，所以都無理到間屋，完全無做過家務，連平日例牌嘅掃地、拖地都欠奉，攪到今日有少少時間就逼住要做番哂，前前後後都做咗大半日.......真係慘！

有時做家務好似係女人嘅天職咁，見到間屋污污漕漕就唔抵得頸，有時就算好攰都要拖埋個地，驚亞女行嚟行去隻腳痴哂塵，ｄ衫草得太多又要洗、無水就更加要煲，樣樣都唔等得，所以一返到屋企就無得停手咁......

但男人就真係少有呢種肉緊，樣樣都無所謂，樣樣都覺得唔趕，可以唔洗做住，真瀟洒，

如果男士可以體貼一點、幫輕一下，女人可以放開一點，輕鬆一下，你說有多好！

乖乖的一天

媽咪放埋今日聽日就要返工喇，所以都趁有時間帶咗亞女去行吓街，我哋去咗太古城，因為媽咪都想同亞女去吓玩具反斗城睇吓玩具，媽咪出門口之前已經同Wing Wing講好可以買一樣玩具，亦再三叮囑今日出街唔好扭抱、唔好扭計......亞女一一應承，好!一言為定.....出發~

全程Wing Wing都好乖，自己行、食嘢又無扭，媽媽都好開心，呢個女都算肯講道理，希望佢可以keep到，唔好成日令爸媽勞氣咯~

買完嘢再去玩車車，Wing Wing次次去親冒險樂園都要玩車車，不過見佢玩得咁開心都由得佢咯~

小朋友拜年

   今日約咗麼麼、博博一齊團拜(其實即係小朋友約出嚟玩囉)，原本吞吞都嚟，不過突然發燒唔舒服，所以都要響屋企休息吓，吞吞，快d好番喇!

我哋去咗麼麼屋企，麼麼媽仲好客氣咁用好多好玩嘅玩具招呼我哋，班細路真係玩得開心~

咁凍嘅天氣，響屋企玩吓唔洗吹風，都幾好，難得大家都休息唔洗返工，希望我哋一班blog友都可以keep住呢類聚會，得閒約吓出嚟傾吓計、玩番吓~

Happy New Year!

繼續...拜年去...

媽媽新年無得放正紅假，但之後呢幾日就攞到假，所以今日媽媽可以繼續帶亞女行街街同埋拜年去~

第一站﹕公園

第二站﹕契姑婆度

等緊姨媽果陣就響新城市廣場度影吓相，媽咪好鍾意呢張，因為真係笑得好開懷!

為食嘅Wing Wing響呢個新年學識咗食瓜子，有時媽媽阻都阻佢唔住，真激c!

亞女最鍾意同表哥仔玩，係咁玩、係咁笑!

第三站﹕姑婆度

Wing Wing坐響DD隔離，盡顯大家姐風範!

第四站﹕食buffet

亞女唔算太有胃口，不過都食咗唔少，証明佢有幾為食呢~

<掛住食，無影相>