27-2-07

亞女愈大，講嘢愈叻，依家呢個歲數就最鍾意講反話，你叫佢食飯，佢就話唔食，你叫佢沖涼，佢就話唔沖，呢ｄ係小朋友必經嘅階段，不過佢都係講吓、過吓引者，真係唔洗同佢勞氣！

重溫11個月時的影樓照

心情...

其實近呢兩個月自己心情都起起伏伏，有感恩的，亦有煩惱的，不知從何提起...

總之，愛我的，就為我的心情禱告吧!

23-2-07

Wing Wing尋晚開始有d鼻水，今日仲發埋燒，真係有d唔開心，事緣尋晚我有d事，將亞女交咗俾工人，(不過其實尋日工人係放假嘅，佢只係義務性質咁由銅鑼灣幫我湊亞女返屋企)，但原來亞女件衫袖濕咗，但工人因約咗人去麥當當，故帶埋亞女去，唔知係咪因為咁就...病咗喇!(真係估唔到只係少少嘅疏忽就已經發燒(仲係101度幾忝)

22-2下雨天

今日有點雨，故也沒動力四圍去，只外出吃了個午餐而已。

下午媽媽同亞女都好攰，結果一齊瞓晏覺，由兩點幾瞓到五點幾，正!

21-2年初四

今早返婆婆度，因亞姑婆都會上去，所以都可以同亞姑婆拜年，表哥仔都係度，所以又可以同佢哋影吓相喇！

你哋睇，表哥仔幾錫表妹，又俾香蕉表妹食...

 

又俾蘋果表妹食...

不過倒番轉表妹就唔肯俾表哥仔食喇...哈！其實係Wing Wing有ｄ怕羞囉！

之後原本諗住可以一齊飲茶，點知時間唔多夠(因媽媽下午要返工)，所以只有留低Wing Wing豬俾公公佢哋繼續下午嘅節目喇!哈!姨媽話想帶埋亞女去濕地公園行吓喎!點知行吓睇吓又食吓之後，到成11點公公婆婆先帶Wing Wing返屋企，媽媽放咗工返屋企仲早過佢哋！哈！好耐無試過返到屋企會見唔到亞女咯！

 

大年初三 繼續拜年

今日第一站去咗Wendy姨姨度拜年，姨媽、姨丈、表哥仔同亞DD都有去，哈！不過表哥仔掛住睇電視，都無心機同我玩！

之後媽媽帶我去婆婆度拜年（婆婆剛由澳門返嚟，所以我哋要第一時間上去），見公公食瓜子食得咁開心....我又想....食！

你哋食唔食呀？

唔食我食！

哈！好味！

19-2-07大年初二

今日去公公度拜年，真開心，見到表哥仔同DD表弟(當然仲有大姨媽、姨丈啦)，我哋係咁影相忝。

飲完茶之後，我哋想去d室外地方影吓相，咁就去咗香港公園喇!你哋睇呢兩表兄妹係咪好可愛呢?

我哋再去商場度行咗一陣，呢兩位小朋友係咁走嚟走去，好攪笑，真係精力十足，好似唔識攰咁!

18-2-07 Happy New Year!

新年快樂!

祝各位新年進步、身體健康!

今日去咗太爺度拜年，好多人呀，哈哈！所以豆咗好多利是呀！

之後我哋去咗許留山食甜品，哈！你睇我食得幾Happy，

梗係啦！媽咪唔係成日肯俾我食甜甜架！

嘩！真係好多利是呀！

 

 

哈!亞女識寫ABC!!

好開心，真係講你都唔信呀!亞女識寫ABC呀!

事緣今晚媽咪同Wing Wing坐係度睇電視、同佢唱吓歌仔咁，跟住媽咪就攞塊神奇畫板出嚟教亞女ABC，媽咪自己寫乍，無捉佢手寫架，之後媽咪繼續睇電視，點知轉頭望吓Wing Wing、又望吓塊畫板，見佢自己撩撩吓，寫咗三個我覺得好似ABC嘅字，嘩!我當堂好開心咁捉住亞女讚佢叻叻呀!大家又俾d意見啦!似唔似者?

哈!亞女識寫ABC!!

好開心，真係講你都唔信呀!亞女識寫ABC呀!

事緣今晚媽咪同Wing Wing坐係度睇電視、同佢唱吓歌仔咁，跟住媽咪就攞塊神奇畫板出嚟教亞女ABC，媽咪自己寫乍，無捉佢手寫架，之後媽咪繼續睇電視，點知轉頭望吓Wing Wing、又望吓塊畫板，見佢自己撩撩吓，寫咗三個我覺得好似ABC嘅字，嘩!我當堂好開心咁捉住亞女讚佢叻叻呀!大家又俾d意見啦!似唔似者?

16-2-07 行花市

今日同亞女去咗行花市，雖然係晏晝，但都好多人，今年有好多吹氣嘅嘢賣，我哋都買咗個吹氣咪，哈!初初亞女都肯揸住架，之後就唔耐煩要拋開喇...

我哋有時就俾佢坐吓車仔，有時就俾佢自己落地行，佢一落地就係咁四圍走，見佢真係好開心，好攪笑!

15-2 亞女半夜一路瞓一路喊

真係唔知點解，亞女都依家為止都仍然瞓唔得冧，成日瞓瞓吓就喊，呢兩晚仲誇張，係咁喊，抱又唔係、唔抱又唔係，最弊係佢唔係真係扭你抱，佢一時話攪攪豬、一時話 '鏈骨'、一時話打pat pat、都唔知佢想點，諗諗吓都唔可以對佢太仁慈，學Daddy話齋，唔好成日佢想點就點，間中都要鬧吓先得!

14-2-07情人節快樂!

情人節快樂!

祝Daddy, Ma Ma永遠開開心心、甜甜蜜蜜!

12-2-07同Daddy一齊BBQ

今日Daddy同班同事去咗BBQ，我都有去玩呀!你睇，d花花幾靚!

媽咪話我都好叻，佢哋d大人燒嘢食果陣我就瞓覺覺豬，差唔多燒完我先起身，時間啱啱好!你睇，我都唔係好痴身者!(呢個唔係媽咪嚟架!...我同其他姨姨行街街呀!幾叻!)

仲識擺番個post影相忝!

"媽媽真係要讚吓Wing Wing 咯，響適當嘅時候瞓覺覺豬，唔洗媽媽咁辛苦，今日行程順利，好開心!

Daddy，多謝你!"

11-2-07 亞女揸機!

今日返咗西平聚會，完咗之後我哋去咗佐治五世公園行吓，覺得呢個公園好有懷舊feel，所以轉咗用黑白去影，呢兩張我覺得好有味道...你哋話呢?...

 

唔洗驚、唔洗驚!呢張唔係無頭東宮，哈!哈!係我哋將最大嘅信心俾咗亞女，叫佢幫Daddy,Mammy揸機影嘅相，哈!雖然係差少少，不過都好叻呀，你知唔知呀，要按個掣都要好大力架!

哈!影第二張係咪好好多呢?...(梗係啦，呢張較咗timer ma!加上你見到我哋嘅極力遷就，咪就好好多囉!)

9-2-07鍾意自己用碟食飯!

早兩日同亞女買咗隻有三格嘅兒童餐碟，亞女不知幾鍾意，依家仲爭住要自己食飯(雖然食到天一半地又一半)哈!不過都食得好開心!

弊!未抹咀忝!