今日是我倆的120紀念日~
我倆選擇了以下的行程﹕
1. 返church
2. 同埋亞女一齊去玩
3. 二人世界食晚餐
既可同亞女一齊玩番日，又有二人行時間，真是樂得無比!
*****************************************
返完教會之後，我哋就去咗大尾篤踩單車，真係好耐無踩喇，今次帶埋亞女，我哋就揀咗呢款大車嚟踩，咁大個人，真係好似無踩過呢款車，不過又幾舒服，唔洗拎住d嘢，好似揸緊私家車咁~
坐底嘆番個tea先~
呢個Wing Wing最鍾意食麵麵，你睇佢食得幾過引~
週年紀念喎，梗要影番張相先啦!(多謝Wing Wing幫忙揸機!)
好少帶亞女郊遊，今日天氣唔錯，都算舒服，希望響炎夏來臨之前可以去多郊外幾次啦~
*****************************************
到咗傍晚，將Wing Wing交託咗俾嫲嫲之後，我哋就出發去食大餐喇~
個景好靚，不過個相機影得唔靚......無計，唯有疊埋心水食大餐好過~
個buffet都幾多嘢食，環境都唔錯，兩個人又可以慢慢坐底傾吓計~
唔洗掛住湊亞女，感覺幾舒服! 所以話呢......間中都要relax吓、二人行吓~
******************************************
今年係鐵婚，唔......即係夠硬淨囉!
舊事已過.......一切都變成新的了!
願神繼續祝福我們這一家!
媽媽同Wing Wing早前響教會借咗一本圖書，名叫<愛>
亞女好鍾意睇，每晚臨瞓前都要媽咪或者Daddy陪佢睇，呢本書好簡單，圖畫多，文字少，點發揮就好睇你點去演繹，媽媽覺得其實本書好有深度，有時大人都未必完全了解何謂愛，細細教佢學習愛人、關心身邊人真是一個好開始，亦可以俾我哋呢d大人再好好重新學習一下! 
好適合響亞女呢個每事問的年齡講俾佢聽~
*******
昨天下午，表哥仔嚟咗我哋屋企，亞女同佢一齊玩balloon，兩個都玩得好開心，不過當個波由高處慢慢跌下時，就難免出現兩個小朋友爭住要嘅情形，哈!媽媽想起平日講嘅故事當中，有講過話要讓玩具俾朋友仔，所以媽媽就提吓Wing Wing﹕
媽﹕Wing Wing，記唔記得咩嘢係愛呀?
你愛唔愛表哥 仔呀，不如大家唔好爭玩啦，
好唔好?
Wing Wing聽完就真係放咗手，仲同媽媽講﹕
我有彼此相愛呀!
哈! 媽媽當然即時俾兩個叻叻同乖乖佢啦，仲有咀對咀kiss一個忝!
見到Wing Wing慢慢將學到嘅道理應用出嚟，果份喜悅真係難以形容~
感謝主!願袮繼續祝福Wing Wing所學到的。
Wing Wing由細到大，食嘢呢方面都唔多要我哋擔心，皆因佢好為食，亦好鍾意食，不過佢正餐肯食，媽媽功勞都唔少，因為媽媽好少俾零食佢食，只係而家愈嚟愈大，先至叫做食多咗d除飯餐以外唔同嘅小食。
不過就算佢有d嘢唔多鍾意食嘅，你花時間氹吓佢、同佢玩吓，佢都可能肯食，好似有段時間佢唔肯食菜，食食吓又肯食番、有段時間唔肯食粟米，食食吓又鍾意咗食......不過到而家為止，亞女仍有一樣嘢係堅持唔肯食嘅，係咩?...就係芽菜喇。就算我哋剪到幾碎混埋d飯俾佢食，佢都可以食完啖飯吐番條芽菜出嚟嘅，你話佢犀唔犀利!
今日媽咪買咗下午茶(雞脾、薯條、熱狗)同Daddy一齊食，不過亞女有d扭計，所以就算佢幾咁想食，Daddy都唔俾，仲玩佢一大餐﹕
Wing Wing: Daddy，我想食....
Daddy: 食咩呀，你咁曳，無得食....
Wing Wing: 俾我食啦!你果d咩嚟架?
Daddy見佢唔擺休，於是就話喇﹕係芽菜嚟架，咁你食唔食呀?
Wing Wing(停頓片刻，再探頭想睇吓Daddy個盒裏面到底裝住咩食物)
Daddy(繼續玩Wing Wing，舉高d個盒，等佢睇唔到)
由於Wing Wing仲未瞓晏覺(已四點多)，所以媽媽認為亞女可能係扭眼瞓先扭得咁犀利，於是都幫吓口，細細聲叫Daddy﹕不如俾條薯條佢食啦!
不過Daddy繼續玩佢﹕好啦!俾你食啦! 嗱--芽菜薯條，你食唔食?
Wing Wing (大喊): 唔食呀!(雖然見到呢條明明係薯條，但都唔肯食)
媽媽﹕唔係，係薯條
Wing Wing (準備擘大口想食)
Daddy: 唔係薯條呀，係芽菜薯條~~
Wing Wing(又大喊)﹕唔食呀! (點都唔食)
媽媽再講﹕係薯條
Wing Wing又再擘大口準備食
Daddy又再重覆玩佢.......
如是者亞女俾我哋攪到佢愈嚟愈忟，但都係唔肯食果條Daddy口中所講嘅芽菜薯條
此時已經笑死Daddy同媽咪喇!
又會明明見到條薯條都會因為佢個名唔同咗而唔肯食嘅......攪笑!!!
亞女d牙一直都黑黑地，自從佢7、8個月大就係咁，縱然已經有同佢刷牙亦無補於事，上次(7個月前)媽媽已經忍唔住帶過亞女去洗過一次牙，果次亞女只係兩歲四個月，一路喊一路洗，只洗咗前面幾隻，為免佢怕咗，所以我哋都無再勉強......
洗完之後當然keep住同佢日刷夜刷啦，一d都唔敢偷懶，但仍然慢慢會出番d黑色嘖出嚟，唉~ 真係唔知點解，而家事隔7個月，媽媽見就嚟新年，所以今日就再帶亞女去洗多次喇.....
今次洗牙前，媽媽已經不斷話佢知係點樣嘅，貪靚嘅Wing Wing好似完全收到哂咁樣，話鍾意d牙白色，話唔驚喎，媽媽為咗確保洗牙過程順利，已多次同佢rehersal，哈哈，亞女由自己爬上張高櫈至俾牙醫用電動牙刷洗嘅過程都好叻，肯試、唔喊，仲好開心忝，雖然媽媽知道到時情況一定唔一樣，但係俾佢有個心理準備都係好事......
洗牙前(前面睇得唔真，不過係有d黑嘖，而內側就勁黑)
洗牙前~唔驚驚的video
洗牙後video
亞女一見醫生又真係好乖咁自己走上張櫈度瞓底喎，媽媽真係無諗過佢會咁合作，之後就開始洗喇，其實所謂洗牙，只係用特別d嘅牙膏同電刷咁同小朋友刷吓者，唔同大人果隻洗法，所以應該唔太痛嘅，而Wing Wing起初亦真係好合作咁醫起排牙俾醫生洗，連醫生、姑娘都讚佢勇敢叻女，直至要洗內側d牙嘅時候，亞女終於頂唔住喇，開始喊，亦要扭走人，醫生話洗內側係會痛d，結果我哋都無勉強，就咁就算喇，Daddy、媽咪覺得Wing Wing已經好叻，俾想像中乖好多，可能呢個女真係一個貪靚嘅小朋友囉!
放咗咁耐假，Daddy同媽媽都有少少擔心Wing Wing再返學會喊，所以一直都同佢做足心理準備工夫，等佢腦海對返學嘅畫面唔好咁陌生!
1月2號，由媽媽湊佢返學，沿途有說有笑，就像以往一樣，到了學校，很多人，大家都忙著帶小朋友換鞋、洗手，媽媽見Wing Wing亦四處望，八八卦卦，媽媽正到準備帶她入課室時，Wing Wing竟回頭對媽媽說﹕我自己入去得喇! 媽媽很感動、亦很欣慰，無扭計不在話，還如此生性，真抵錫!
<其實自表哥仔和爺爺有事以後，媽媽已感受到Wing Wing很懂事，那時家中各人常進進出出醫院，很多時更要帶著她一起往探病，病房入不得，亞女便靜靜地在外自己玩，又不時問候二人情況，開始學懂何謂關心，媽媽亦藉此教導她多為別人祈禱，學習愛身邊的人，雖然有些時候仍有淘氣、扭計的表現，但這也是很正常小朋友的表現，故媽媽對Wing Wing仍覺很欣慰、很感恩，連爺爺也讚Wing Wing精靈可愛、又懂關心他的病呢!>
感謝神，賜我一個活潑可愛、懂事乖巧的女兒!
