加油!!

原本已放棄寫blog，不過一想到他日子女大哂，自己無咩好做，又驚無哂d回憶(因愈嚟愈無記性)，所以決定一有時間都照寫下亞仔亞女d生活點滴，等第時得閒都可以睇返~

真係要加油!!

上排小臼齒甩喇~

7月23日
亞女一直都話d牙鬆，不過係一時話呢隻、 一時話果隻，搖吓d牙，又未鬆，攪到我哋都無理佢，呢日，突然佢話隻牙好痛(上排右小臼齒)，媽媽用手大力少少同佢剝，已經甩咗出嚟，好快，咁又攪掂一隻!

7月24日
翌日已經見有隻白色牙仔出緊嚟，唔怪之得甩得咁快啦!

2013K3同學會赤柱遊

7月21日

亞女同幼稚園同學仔約好齊齊去赤柱玩，雖然初頭有d雨，不過都ok，小朋友玩得好開心，而小b就係第一次去沙灘，媽媽一直猶疑好無俾佢玩水，不過見落下，水可能會凍，於是就打消呢個念頭，只係玩到中途，興起想掘個窿，放小b落去，於是小b就可以第一次感受吓d沙嘅可愛喇!

兩日一夜短線遊

14,15/7/2013

今次見亞女放暑假，就短短哋同佢去咗大陸玩兩日，無帶亞B去，可以專心同亞女玩，佢都好開心!

711小Ｂ四個月大

７月１１日

小Ｂ四個月大喇，又同小Ｂ影相～

飲奶粉喇~

7月8日飲埋最後一餐媽咪奶就全飲奶粉喇，媽媽成功餵咗小b近4個月，比預期時間長咗lu，所以媽媽都覺得幾開心，不過始終要返工，加上小b飲奶唔合作，所以都唔再繼續餵喇，ok啦，小b都吸收咗最精華果d奶奶喇~

剪頭髮

17/5/2013

媽咪第一次同小b剪頭髮

工人抱住小b，由媽咪操刀同小b剪髮，小b當然係勁喊啦，哈哈，不過都算順利，最後剷咗兩旁的頭髮，留番頭頂同後尾的頭髮~


29/6/2013

媽咪第二次同小b剪頭髮

今次將小b放在膠墊上，工人幫手按住亞b，情況好過上次，亞b無掙扎得咁厲害，今次主要都係剷兩旁頭髮，修剪吓頭頂個海膽頭，後面依然唔剪~

媽咪奶

小b出世到而家都係食媽咪奶，不過只係頭兩個月係全人奶，511之後都開始補奶粉喇，無計，因為媽咪開始返工，真係有困難，自己亦開始因幾時泵奶而有壓力，街又唔敢去得耐，所以慢慢都放開了，決定自己ok就餵人奶，唔ok就俾奶粉，有時即使人在家，唔想餵我都會俾奶粉，免得自己太辛苦。

其實小b埋身食媽咪奶同亞女果時都好唔同，亞女食得正常d，而小b就古靈精怪，成日郁嚟郁去，撐手撐腳，抱住佢食奶真係好似打仗咁，同佢鬥力，佢食食吓又會扯吓，扯完又食番，真雖然唔係好痛，不過真係俾佢激c囉! 呢個都係媽咪唔太鍾意埋身餵嘅其中一個原因。

不過媽咪都知呢d親子時光要好好珍惜，所以而家都仍keep住間中餵吓，哈哈，間中抱住呢隻豬仔又幾可愛嘅!