開籠雀

自從Wing Wing返咗學之後，多嘢講咗好多，每日放學都跳吓跳吓咁返屋企，返到屋企就自己放番好書包，仲好鍾意唱番響學校學嘅歌仔，雖然有時唔聽得好清楚佢唱咩，但見佢好投入咁唱，都feel到佢果份興奮，佢近日仲好鍾意玩改歌詞忝，即係將原本已經識嘅歌仔亂唱一通，配哂自己隨意嘅詞落去，就又跳又唱......好攪笑！（哈！而家想佢正正經經咁唱番首打開蚊帳都幾難咯！）

呢兩晚媽媽都可以陪佢玩吓，發覺Wing Wing已經玩緊角色扮演，一時要做照顧我嘅人、餵我食嘢（佢手上嘅積木或者玩具），一時又扮老師叫我坐定定、乖乖地，一時又做番小朋友跳嚟跳去，今晚仲同我講﹕Wing Wing係細路仔，媽咪係大路仔，

媽咪再問係邊個教你架，佢又亂答話係媽咪....俾佢激死！

見到亞女成隻開籠雀咁就feel到佢好鍾意返學，學校嘅生活真係唔同屋企，學校俾到佢嘅父母未必俾到，所以真係無後悔俾亞女讀N1。