無可否認，Wing Wing有時係幾叻嘅，亦有時係幾乖嘅......
無可否認，Wing Wing有時係聽教嘅，你同佢講道理，佢係明嘅，只要你肯慢慢講、慢慢教，佢就會聽......
由出世至今，一直都覺得亞女唔算太曳，佢曳嘅都係一般小朋友嘅曳嘢，你問我，我會話佢算易湊......
但......
近日發覺佢真係愈嚟愈嚟難教，佢有佢一套，又鍾意做呢樣、做果樣，係幫手嘅嘢就梗係俾佢做啦!但係攪攪震嘅你又會唔會俾佢做呢?所以一直我都定個界線好分明，邊d得，邊d唔得，佢知，一直都知，但而家開始挑戰我，逐d逐d咁做d曳嘢出嚟，我成日覺得係同俾老人家湊有關，佢有佢哋嘅教法﹕亞女一喊就俾糖佢食(話係止喊糖喎)，要邊樣就俾邊樣，務求令亞女唔好扭計，真懶得同佢講道理。唔單止公公婆婆係咁、爺爺嫲嫲亦一樣，唔通上一代就係得呢d教法??
有時自己太攰，都唔想徙口水同亞女講道理，所以我亦明白老人家嘅體力問題係有影響嘅，佢哋肯湊已經好好架喇，真係好難要求咁多......
而家亞女郁d就喊，係又喊、唔係又喊，扭呢樣扭果樣，成日都掹掹憎憎咁，原本自以為對小朋友有耐性嘅我都開始煩，因為剛同佢解釋完A，佢又扭B，我邊得咁多時間、精神??要湊佢、要帶佢出吓街、諗兩餐、要做家務，仲要輪班工作，都咪話唔辛苦，只是......一直覺得應付得來........但......
近日看到電視劇的預告，話師奶唔易做，內心真係好認同，我真係好佩服果d要返工嘅師奶們，更佩服果d全職嘅師奶強人，你估師奶好易做咩!呢套劇我一定睇，希望從中學習一d秘訣啦!
登!登!登!登!trouble two 報到啦! 小朋友响呢個時候最鍾意試吓大人嘅底線!尤其是有唔同嘅人湊, 睇吓有無位可以走,所以最好同長輩商量一個大家都一致嘅方向, 然後堅持到底, 至會成功 參加一些育兒課程都好有用,我近來讀緊香港基督教服務處的course, 請參考 http://www.hkcs.org/index.php
回覆刪除湊小朋友一定要有耐性，但係呢樣一直以來都係我既弱項，有時可能唔係好曳既事，因為我既耐性問題而攪到好激氣！小朋友大大吓就愈有自己既主見，有時真係唔知點教架！大家一齊加油呀！
回覆刪除祝各位 母親節快樂 ! 當孝敬父母，使你的日子在耶和華你 神所賜你的地上得以長久。 ( 出埃及記 20:12 ) http://hk.myblog.yahoo.com/Spindrift-HK/
回覆刪除(Empty)
回覆刪除其實係老人家太錫佢地，而且要老人家同佢地講道理好難，佢地只想個細路開心唔想佢地喊，如果你同佢地講佢地又會唔鐘意，而你又不得不放給他們幫手。而家唯有等Wing Wing返學希望情況會有改善啦。
回覆刪除師奶真係好唔易做架！我自己要返工，晚晚放工要去買餸，再急急腳趕返屋企湊女，同佢玩，同佢沖涼，陪佢瞓覺．．．好在個工人幫下手洗衫煮飯，但都覺得辛苦，何況果 d 全職媽媽！你有老人家陪下個女，對阿女同老人家都有好處！老人家湊孫一般唔會有 "教" 果種責任，就好似工人湊小朋友，只會照顧而不會教，所以不知不覺間就會縱容左個小朋友。我都好明白你既感受，希望 wing wing 豬返左學會聽話 d 啦！
回覆刪除好！就一齊努力做師奶強人啦！（哈！不如組隊做師奶乒團啦！ ）
回覆刪除