17-5 新挑戰! -- 去洗牙

Wing Wing豬ｄ牙不嬲都黑黑地，但媽媽一直唔係好明，其實由佢一出世我哋已經有幫佢刷牙仔架喇（未有牙果陣我哋會用紗巾捽），都唔知何解仍然咁黑，經BK d 媽咪介紹下，搵到個對小朋友有經驗ｄ嘅牙醫，所以今日就專程入到去荃灣睇佢喇！一嚟希望個牙醫可以解釋清楚ｄ比我知係咩原因，二嚟如果亞女肯嘅話，都想同亞女試吓洗牙，等佢唔好成日比人問、比人指指點點....希望順利啦！

不過去之前又俾亞女發現附近有個公園，所以我哋都去玩咗一陣（哈！等佢心情輕鬆ｄ麻！）

原來呢度都有呢款搖抱板！

******

跟住我哋就去個牙醫度喇！

一早已同Wing Wing講解清楚ｄ步驟（今朝仲響屋企rehersal過忝！由Daddy扮牙醫，哈！不過亞女都係驚）入到牙醫房，佢已經好驚咁攬住我喇！（預咗！）抱住佢聽醫生講解咗一陣之後，就嘗試同亞女用特製嘅牙刷仔同佢刷牙喇，個醫生係ｄ紅色嘅膏嚟刷架，個刷軟身嘅，應該就唔痛嘅，不過亞女仍然係咁喊，我要抱住佢一齊坐響張牙醫櫈度，後嚟都只係刷咗前面果幾隻，內側同大牙就未攪掂，不過唔緊要，我覺得亞女已經好叻架喇！兩歲乍喎，可以去洗牙，真係一個大突破！

所以為咗獎勵佢，我就帶咗佢去冒險樂園玩喇！

亞女不嬲對ｄ機動遊戲都有ｄ驚，但今次見到呢架車車就好鍾意喇，於是我都俾佢玩咗陣，仲同埋呢位妹妹一齊坐忝！

之後介紹亞女玩吓碌保齡，但佢似乎麻麻地鍾意......

好重呀！不如響地下碌啦！

我碌！

一碌完即轉身走，哈！有個性！

Wing Wing似終都係鍾意去公園，哈！我都無謂強人所難咯，獎你去公園就得喇！（仲慳番ｄ忝！）

你睇佢幾開心！

媽媽﹕Wing Wing, D 牙白咗喇，笑嚟睇吓啦！

Wing Wing:　無端端點笑喎！

媽媽﹕好喇好喇！等你想笑先同你影啦！

等到啦！

Wing Wing:　我笑！

媽媽﹕嘩！係好靚喎！

媽咪，我唔笑都靚啦！

＊＊＊＊＊＊

後話﹕

其實亞女一直都知自己ｄ牙唔靚架，哈！你問佢靚唔靚，佢會答你靚，你問佢ｄ牙靚唔靚，佢就好快咁答你﹕唔靚，仲識講話自己ｄ牙係黑色嘅，我覺得咁先好，起碼佢有心理準備，大個ｄ懂事果陣會明白洗牙可以幫到佢，就會合作一D 啦！

醫生話都要Keep好ｄ，如果唔係會慢慢藏漬架，所以嚟緊刷牙要刷乾淨ｄ先得喇！努力！