22-5 表兄妹的情侶裝！

早前買咗兩件衫俾表哥仔同亞女，一樣款嘅，心諗兩表兄妹一齊著住四圍行都幾可愛，咁就疊埋心水等亞表哥仔落嚟一齊著，到咗今日終於等到喇......不過落雨，好夢成空，唔可以出外影靚靚相，於是我哋唯有響屋企影啦！

件衫好可愛架，係隻馬騮嚟！仲要係好大個口果隻！

表哥仔唔鍾意食橙，於是就係咁餵亞表妹食喇！

呢張係亞女好深情咁望住表哥仔果陣媽媽影到嘅......好攪笑！

Wing Wing:　弊！俾媽咪影到我最深情嘅眼神忝！

＊＊＊＊＊＊

跟住見細雨ｄ，公公要帶番表哥仔去深圳喇，而我哋就去咗麼麼屋企喇！（因為都係響附近）皆因Wing Wing有個重要任務呀--就係親手送上麼麼嘅生日禮物喇！（一早買咗架喇，咁遲先送到，希望麼麼唔好介意。）初時媽媽都擔心咕樣嘢麼麼已經有，好彩麼麼媽話仲未買（不過正打算買！）嘩！好彩，希望麼麼用得著啦！

到步後第一個自創嘅遊戲--轉轉椅，由麼麼媽發明--好玩兼唔洗錢(哈！仲激過ｄ機動遊戲）

你睇吓，亞女玩玩吓開始驚喇！証明係真係好激架！

＊＊＊＊＊＊

兩位媽媽又可以聚吓、傾吓計，兩位小朋友又可以一齊玩吓，所以話呢，落雨都唔一定無節目嘅！（如果今日天晴，睇怕我哋都去咗指定活動地方--公園咯！）