9-6 終於入到波波池！

今日同咗姨媽、表哥仔、DD、公公、靚姨同埋表哥仔嘅契媽、契爺去咗太古城嘅冒險樂園玩，一到步亞女就瞓咗覺，媽咪同靚完走去食先個tea佢先起身，跟住我哋就會合表哥仔喇！點知佢已經去個波波池玩完又玩喇，姨媽問我一唔一齊玩，我就話亞女仲未夠高玩（因佢仲未夠90cm），但姨媽話ｄ職員都無度過，且姨媽一指---我見到波波池入面竟然有個應該未夠一歲嘅ｂｂ坐響度，哈！於是最終我都有同亞女去玩！（ｄ職員真係無check就俾佢入喎！）

第一次真真正正咁嚟到呢類波波池玩（媽咪同Wing Wing都係第一次！）真係玩得好開心

，尤其ｄ滑梯夠哂滑就最好玩（唔似ｄ公園滑梯咁貼住哂）！

我哋玩玩吓表哥仔同Wing Wing都唔肯著襪，除咗襪玩都無人理，攪笑！（不過下次我會守番規矩同佢哋著番襪架喇！）

之後我哋又玩咗波波池隔離嘅揸火車，亞女同表哥仔一齊坐，未玩之前我都緊唔知亞女會唔會驚，不過見佢坐底果陣都無喊，就知佢鍾意玩喇！（亞女平時都好鍾意玩車車）反而表哥仔玩咗一個圈就喊喇，真係無諗過表哥仔會驚（因佢平時都好鍾意車車架！），ｄ姐姐唯有按停列火車俾佢媽媽抱番先啦！亞女就自己一個繼續玩，自得其樂！（不過媽媽相機無電，無同佢影相，唯有下次先啦！）

＊＊＊

媽媽心聲﹕

初初亞女瞓咗覺嘅時候，難得可以同靚姨傾吓計，大家都覺得冒險樂園好成功，差唔多個個小朋友都鍾意玩波波池，成三十蚊15分鐘，都咪話唔賺到笑，但見ｄ細路玩得咁開心，ｄ家長就只會愈嚟愈玩得多ｄ，可能帶佢哋去街就只會諗到冒記或者反斗城，諗諗吓，同以前比，幾個枕頭、幾條毛巾仔已經可以玩上半天，有時睇番，而家嘅消閒玩意已經無咗自己嘅創意，好多都係現成有嘅玩具或者玩嘅場地（好似波波池咁），記得以前我哋三姊妹好鍾意收集不同形狀嘅擦子膠，模擬間屋仔出嚟，話呢舊膠擦似梳化、果舊又似枕頭等等，完全自己諗出嚟玩餐飽，真係發揮到自己嘅創意架！

希望現今家長可以好好平衡一吓帶小朋友去玩嘅心態，唔係只得冒險樂園同迪士尼架，其實好多簡單嘅玩意都可以好好玩，只要你陪佢一齊玩佢哋就開心喇！