23-6 即興的節目

尋日媽咪買咗件泳衣俾Wing Wing，即晚洗好吹乾，諗住俾亞女今日試吓啱唔啱著，今早一試，都啱身，預期會突個大肚dum...都依然係有突，不過媽咪覺得細路仔，著吓三點式或者兩件頭泳衣係最可愛嘅! 你哋睇吓Wing Wing得唔得意?

試著完泳衣之後，亞女係咁話要游水水，又走去攞浮板、波波，唉.....你都未好得哂，我點敢帶你去呢.....唯有同佢著住玩多陣、影吓相咁囉!

******

跟住收到麼麼媽來電，諗住約埋一齊去西環個playroom玩，於是約一點我哋又去咗玩喇!

我同麼麼都好鍾意玩呢個腳板cushion，碌吓碌吓好好玩!

Wing Wing: 麼麼，等埋我呀!

麼麼: 好啦!等我擺個post影張相先啦!

跟住join埋Daddy行街街，我哋去咗旅行社睇資料，想去吓番禺新開嘅水上樂園，不過唔係幾啱，反而亞女成日叫住想去游水水，Daddy就即興話不如去游水咯，果陣已經四點幾，真係好即興喎，媽咪今晚仲要返夜，但計吓d時間，又趕得切喎，於是我哋就照計劃而行--游水水是也!Yeah!

泳池晏d果節時間係開六點，我哋5:45pm出門口，慢慢行去，亞女就最攪笑，攬住d水泡、浮板自己行，哈!我哋由得佢架，全程望住佢就由佢自己行架喇，d途人見到就覺得好攪笑囉!

去到已經有好多人等緊喇! 好興奮呀!

我哋玩到將近6:45pm就走喇，因為開始有d風喇，費事亞女冷親，都係先走為妙，今次一家人都玩得好開心，亞女亦唔驚水，全程好放膽咁玩，正! 亦增加我哋帶佢去游水嘅動力喇!

亞女，遲d再帶你玩過!