泰山公德會

4月2日

今日陪老爺去咗北角一間中醫館度睇醫生，其實老爺經歷呢一年多癌症嘅折磨真係好辛苦，化療、換骨髓咩都做齊，原本換完骨髓真係好D，真係俾大家有個希望架，不過最後都係受感染，再響個肺度發現有癌細胞......醫生話都盡咗力，嚟緊有嘅日子唔會太長......

最後大家都決定唔再負擔昂貴嘅醫藥費同針藥，老爺反想嘗試試早前在電視介紹的這間民間慈善醫館﹕泰山公德會。

老爺係第二次嚟，佢已經試過兩濟藥，佢覺得飲完之後幾好，所以打算繼續睇，而我就係第一次嚟，呢間醫館整整齊齊，D職員好好人，老爺話佢哋多數係過來人或者是其家人曾患癌症的，我睇吓D單張，原來呢間醫館專診治癌症病人的，好多曾患癌病的人都可以慢慢康復，加上呢度D醫師全部義診，執藥又平，真係體裇一般患病人士的經濟情況，俾我印象好好。

再睇，原來呢間醫館已經受社會好多有名人士支持，高永文醫生(中大教授)、勞永樂醫生、葉劉淑儀、阿虫、吳剛師傅等等.....

其單張簡介﹕......泰山公德會經多年不懈努力，取得社會各界響應，於98年開辦中醫慈善門診，聘名中醫免費為癌症病人診治，醫人無數，效果良好，甚獲口碑，去年獲香港中西區議會、民政事務總署協助，中國醫學科學院信息研究所、香港兩間大學醫學院及醫管局的支持，取得使用港島中環中心，成立<癌研匯析中心>，並將組織<愛心醫護列車>，長期經常深入社區進行癌症防治、教育、義診、諮詢和向高危人群做防癌檢查，希望盡力減少本港市民的患癌機會及死亡率。

當日因其中一醫師放假，我們等耐咗，但果度D姑娘、職員好好，係咁同我哋傾計，亦鼓勵我哋同身邊嘅病友互相分享、大家溝通吓，起初老爺都無咩嘢講，不過聽聽吓大家都係癌症病人，話題離不開如何辛苦、如何痛楚，大家傾傾吓時間又易過D，最有趣就係大家都在說瑪麗的不是(怎樣不夠人手啦、藥費貴啦、想搵醫生講多兩句都難啦咁.......)唉....相信都是人力物力嘅問題，瑪麗D醫護人員都唔想嘅......

最後無花無假，4日藥(星期四、五、六、日)只須$152，希望中醫嘅調理可以幫到老爺唔洗咁辛苦啦!

Do our best, God will do the rest!!