6-8 返學喇！返學喇！

返學喇！返學喇！

Wing Wing終於要上人生的第一課喇！

媽咪，我準備好喇！快ｄ出門口啦！

去到學校，亞女已經急不及待要入門口喇，見佢真係好期待返學咁，媽媽個心都有ｄ安慰，希望佢鍾意返學嘅心可以保持耐ｄ，一直到大個啦！

今日返學時間只係一個半鐘，因為係第一日，主要係俾ｄ小朋友適應吓，入到學校同亞女洗完手、換咗鞋之後，佢就好似知道要同媽媽分開咁，要叫埋媽媽一齊上堂....當老師好識做咁帶開Wing Wing去上堂嘅時候，亞女都抱住依依不捨嘅眼神喊咗出嚟，媽媽繼續同佢講拜拜，然後走人......過咗一陣，媽媽望番入學校，哈！亞女已經收哂聲....玩緊滑梯咯！哈！媽咪ｄ朋友成日話佢喊又喊得快、停又停得快，真係珍珠都無咁真，不過都好......媽咪都係想咁啫！

＊＊＊＊＊＊

11:15am準時放學，老師同媽媽講話Wing Wing今日都好乖，飲水、食生果都無問題，媽媽問老師，咁除咗一開始有喊之外，仲有無喊呀？老師都話之後無喊，一直都好乖咁玩，只係去廁所果陣唔小心痾濕咗褲仔啫。都算係咁咯，第一日返學，媽咪覺得Wing Wing真係好叻！抵讚！

之後問Wing Wing今日返學做過ｄ咩，佢就話玩滑梯啦、玩波波啦、玩車車啦、食餅餅啦咁，俾我感覺佢真係好開心、好鍾意返學，感謝主！希望嚟緊嘅日子佢都咁開心啦！

而媽媽，亦攞咗一星期大假陪佢返、放學，希望佢可以快ｄ投入校園生活啦！