26-8 封路

今日返完教會，就同亞女去咗吉之島買嘢，我哋亦有行吓太古城商場，去吓反斗城，哈！媽媽見到有隻好大隻嘅獅子公仔，就攞去問Wing Wing要唔要，哈！佢走都走唔切！但其他動物公仔如老虎、大象、熊貓就完全唔驚.....睇怕亞女一扭計唔聽話，獅子就最幫得手咯！

到我哋回程坐van仔果陣，銅鑼灣竟然有好幾條主要行車線都封咗路，攪到亞司機叔叔都好'興'，左轉右轉，後嚟先知原來係紮鐵遊行.....好彩亞女響車度都瞓到，無影響，到差唔多返到屋企先醒，哈！佢就真係醒目喇！