24-8 媽媽，生日快樂！

Happy Birthday!

今日係媽媽生日，Wing Wing一早已送好聽生日歌一連香吻一個

，而Daddy更是今日行程的策劃人，好開心，因為Daddy為媽媽所預備的正是媽媽想去的地方--水上樂園，就係深圳嘅歡樂谷喇！

以往嘅生日多數係二人世界，就算亞女出咗世，Daddy,媽咪都會響呢ｄ特別生日自己去吓街，玩吓，但今年嘅生日就熱鬧得多，因為約埋靚姨、公公同表哥仔一齊去玩，去呢類樂園玩，好似人多ｄ開心ｄ喎！

感謝主！原本之前果晚深夜仲落緊大雨

，但今早一起身已經天色晴朗喇

，我哋去到深圳仲超熱忝，所以原本呢個樂園仲有好多其他嘢玩，媽咪都因為太熱無心機玩喇，一心只想快ｄ去玩水，所以最終我哋大部份嘅時間都響呢個水上樂園喇！

呢度都好大，可以慢慢玩，不過大人玩果ｄ坐住大水泡嘅滑梯就有ｄ關咗無開，而且ｄ大水泡都唔多，要排隊攞。哈！Daddy，媽咪一場嚟到梗係照排隊玩啦！都OK喎！幾好玩！

而Wing Wing同表哥仔就最鍾意玩呢條滑梯，我哋響呢度都逗留咗好耐呀！

呢個係大浪池，好似以前香港嘅水上樂園果款！

小朋友池邊踢水最開心！
 

＊＊＊＊＊＊

到咗６點幾，公公同表哥仔就返屋企喇，而靚姨就同我哋一齊食飯，由於媽媽好想食buffet，所以Daddy就安排去試吓深圳酒店嘅buffet喇！我哋去咗香格里拉酒店，原本都諗住會好貴，但睇吓個價錢，都OK喎，＄168 (另15%服務費），於是我哋就響呢度落腳喇......今日真係好攰，幾大都要食番好ｄ先！
  

呢度ｄ嘢食都幾好食，多款、特別，靚姨、Daddy同媽咪都大讚，而亞女就更加唔洗講啦，佢簡直係全程無停過，係咁食、係咁食，大家都食得好飽，哈！不過真係食得好開心！