唔退燒!!

呢幾日對我嚟講實在好辛苦，啱啱先叫做有番ｄ精神（愛我的﹕多謝你為我祈禱

），事緣係咁嘅﹕７月７日（星期六開始媽媽就頭痛加上發燒，到咗夜晚就仲更加辛苦（半夜燒到１０２．６度），故星期日一早就去睇醫生，仲要求醫生幫我打支針（因為真係太暈喇）之後係咁瞓（但其實唔係咁易瞓到，唔知點解呢？）響張床度典吓典吓，瞓過吓之後就退咗少少燒喇！點知輪到疴、嘔喇，唉......真陰公，嘔得我好辛苦，半夜又燒番（１０１點幾度），星期一上、下晝我都好辛苦，又暈、又嘔（食咩嘔咩）、又攰、又占寒占凍咁......唉，於是打番俾亞醫生，佢叫我再去睇佢（今次就無收錢）打咗支止嘔針同埋改過ｄ藥，但係到咗夜晚仍然有嘔（點解ｄ菌咁犀利架？）好辛苦先食埋最後果次藥走去瞓覺......點知今朝起身探熱又係１０１度（激死人）退極都退唔到燒，同蝦子餅商量，見四日都退唔燒，決定去眕急症（好彩蝦子餅返晏可以陪我，如果唔係肯定我又攤咗響張床度一日）睇完返嚟食咗藥好咗ｄ，ｄ燒亦慢慢退，見效好多，希望唔好再反反覆覆喇！

衷心多謝﹕蝦子餅悉心的照顧同埋公公幫手湊Wing Wing豬，仲有梗係婆婆嘅靚粥啦（不過都嘔咗少少！）唔少得嘅，就係你哋嘅慰問，多謝哂！