31-7 表情多多

今日媽咪放假，打算帶亞女去行街街，因為諗諗吓，亞女下個禮拜就開始佢返學嘅生涯喇，所以媽咪好想趁呢幾日帶亞女去吓街、最好去遠ｄ行吓、玩吓，皆因第時就會無咩機會平日去街街咯！

咁媽咪就同亞女著靚靚喇！媽咪見亞女著得咁靚，又好想同佢影吓相先出門口，點知一叫佢擺post就表情多多、攪笑！

郁嚟郁去攪到張張都朦朦哋，好不容易先影到呢張企定定嘅相，但係......又好似古靈精怪果ｄ樣可愛ｄ喎！呢張好似正經得滯！
＊＊＊

我哋去咗西九龍中心行咗陣、玩咗陣，果度都有間冒險樂園，入面仲有個波波池忝，但一諗起７月頭嘅可怕經歷就真係咪攪喇，所以都只係逛咗陣就走喇！

跟住見一隻手額仔幾靚就買咗俾Wing Wing喇，你睇，佢幾開心，ｄ古靈精怪樣又出嚟喇！真得意！

行程仲未完，因為Daddy搵咗媽咪幫手要去上環幫個姨姨攞份玩具，所以我哋又去咗信德中心喇，攞咗份玩具之後，亞女都忍唔住，好想好想攞嚟玩，不過媽媽一早講好係幫個姨姨攞嘅，佢都明白無再扭......只係望多幾望囉！

影張相留念算啦！