又有笑話

亞女近日有好多笑話，媽媽記都記唔切....真係要帶定d紙筆響身先得......

(一)

有一日，Wing Wing同媽媽外出，佢行行吓就同媽咪講

女﹕媽咪，我個膝頭喺後面呀!!

媽﹕吓!膝頭喺後面，乜唔係喺前面架咩??

女﹕唔係呀，你睇吓，喺我後面囉.....(然後望著後面地下，原來佢正指住佢個影)

媽﹕哦，你話你個shadow喺後面呀......

女﹕係呀! 

(二)

而家一遍奧運熱，媽媽有時都會同Wing Wing一齊睇奧運，仲會一齊為中國打氣忝，唔知佢係咪打氣打到入哂腦......

有一日，同佢一齊坐小巴過海，還有一段距離就要入隧道嘅時候，佢突然大大聲咁叫

女﹕加油! 加油!加油!

媽媽都俾佢嚇一嚇，但又覺得佢好可愛，當架車一入隧道，佢就好似人哋衝線咁叫

女﹕Yeah!好嘢!第一lu!

(媽媽覺得佢好可愛!)

(三)

有一晚，媽媽用手臂側抱Wing Wing，邊攬住佢邊睇奧運，亞女吱吱喳喳係咁講緊嘢，媽咪果刻想佢細聲ｄ（等媽媽可以睇吓電視），突靈機一觸，同亞女講﹕

媽﹕Wing Wing，不如你扮ｂｂ瞓覺呀？（媽媽用抱ｂｂ的手勢攬住佢）

女﹕好呀！

（媽媽見呢個方法幾湊巧，可以安靜少少睇吓電視，正高興之際......）

女﹕媽咪，不如我扮ｂｂ喊呀！

（跟住就......）

（四）

早排同亞女傾計，講開行雷閃電，媽媽問Wing Wing

媽﹕Wing Wing，學校聽唔聽到行雷聲架？

女﹕聽到架，好大聲架！

媽﹕好大聲架，咁有無小朋友喊呀？

女﹕無呀！

媽﹕哦......

女﹕得我喊乍......