又有笑話

講嘢叻叻嘅Wing Wing有時講ｄ嘢真係好好笑，哈！媽媽唔想就咁笑完就算，所以真係走去攞紙筆記低佢，等佢第日自己睇番笑ｃ佢！

笑話（一）

早幾日同麼麼一齊去花展，去到大草地，佢同麼麼走嚟走去，Daddy媽咪亦自己睇吓ｄ展覽，無幾耐，Daddy行嚟同我講﹕亞女叫你呀！講真媽媽有少少奇怪，因為亞女好少玩玩吓嗌亞媽（哈！多數係扭計或者要尿尿先搵亞媽）於是媽媽問亞女﹕

媽﹕Wing Wing，你係咪叫媽媽呀？

女﹕我叫麼麼乍！　（跟住又跑去搵麼麼......）　　　（都話玩緊唔會叫亞媽架啦！）

 

笑話（二）

有日，媽媽有個電視節目想睇，未做之前同亞女玩咗一陣balloon，亞女好鍾意玩，所以到做果陣亞女就想媽媽繼續同佢玩，媽媽同佢講廣告果時先再同佢玩，佢都好合作咁行開咗，不過佢嘅耐性只有數分鐘，無幾耐佢又走嚟，扮哂老師嘅口吻﹕

女﹕（揸住個balloon向住媽媽）你哋仲玩唔玩？唔玩我收咗佢架喇.....玩唔玩呀？

媽﹕唔玩喇！

女﹕真係唔玩啦麻，咁我收咗佢，你哋無得玩架喇！

媽﹕哦......

女﹕但係收埋咗你哋唔好喊喎.....（而家好似係你唔捨得收喎...）

隔咗一陣又由房間走出嚟，同媽媽講﹕

女﹕你哋要玩噃！

媽﹕點解呀？

女﹕因為神鍾意你哋玩balloon麻.....

媽﹕　（笑死....）

女﹕知唔知？快ｄ玩啦！

媽﹕

笑話（三）

媽媽ｄ脊骨、腰骨不嬲都痛痛哋，所以出街抱得亞女耐，媽媽都會同佢講﹕媽媽唔夠力呀，媽媽腰骨痛

點知有日猜Wing Wing 去街，個懶鬼想扭媽媽抱，就學ｄ唔學ｄ咁同媽媽講﹕

女﹕媽咪，抱抱呀，我好攰呀！

媽﹕媽媽都好攰呀，你自己行啦！

女﹕但係我隻腳腰骨痛呀......

媽﹕

笑話（四）

平時同Wing Wing出街坐車，望出窗外海景如果見到大隻果ｄ船船，媽咪會教佢呢ｄ叫Ship，如果細隻嘅船仔，媽咪就會教佢呢ｄ船仔英文叫boat。

早幾日，Daddy車我哋遊車河，途經海邊，自己大大聲講﹕Ship呀！Ship呀！但係講講吓，變咗booship呀！ booship呀！（想講boat，ship，但講到好似粗...口...咁!)

笑ｃ！