聯堂崇拜

今年第一次參加教會的聯堂戶外崇拜，去咗九龍民生書院，果度真係好大，環境優美，媽媽都係第一次去果度。

原本想帶住亞女參加成人崇拜嘅，而亞女亦好合作無扭計，不過ｄ司事見到我帶住個小朋友，都會好善意咁走埋嚟介紹我去兒童崇拜，唉，個個都咁講，攪到亞女自己都扭話要去兒童崇拜，結果我哋最終都係去咗兒崇果邊～

今日個主題都係講番耶穌受難，亦介紹何謂逾越節，班導師好有心思，準備昔日以色人嘅食物俾一班小朋友試吓，印象深刻ｄ又具意思，媽媽好鍾意呢個環節。

（食物有﹕無烤餅、烤羊肉、葡萄乾、苦菜、芹菜、無花果、果醬同埋葡萄酒）

 

又有一話劇講耶穌為門徒洗腳，當中飾演耶穌嘅弟兄就真係幫一班小門徒洗腳，相信呢一幕小朋友亦會留下深刻印象。

呢位係其中一位好Nice嘅導師！

成個大球場，由得ｄ小朋友周圍跑，亞女不知幾開心，仲跑到出哂汗～

＊＊＊＊＊＊＊＊＊＊＊＊＊＊＊＊＊＊＊＊＊

到咗晏晝，Daddy做完嘢就車咗我哋遊車河喇，Wing Wing不知幾鍾意坐車，直情唔願落車，我哋去食lunch果陣叫佢落車都唔願，仲話要坐響架車入面幫手睇住架車，笑死！

之後仲舒服到瞓埋，真識嘆！

到咗夜晚我哋又再出動，車媽媽返工之前去咗數碼港一轉～