4-10 亞女兩歲半喇!

10月4號，Wing Wing豬兩歲半喇!

每個月嘅4號，媽媽都會同佢度吓高，亞女嘅高度好似處於平台期咁，3個月來都只係高咗約0.3/0.4cm，而家仲未到89cm，不過媽媽又唔擔心，佢咩都似Daddy，相信大個都會有番咁上吓高!

至於體重方面......一樣係平台期，一直都係徘徊響27/28磅，哈!不過媽媽亦唔擔心，佢咁為食，真係驚佢肥多過驚佢瘦囉!

******

今晚唔想煮飯，想同亞女出去食，於是就叫埋爺爺、嫲嫲一齊去咗旺角食火鍋喇，亞女唔計錢、又食得，真係要趁佢細細個唔洗收錢帶佢去食多d咯!

放咗學沖好涼就同亞女著靚靚出發喇！

點知架車差唔多到旺角果陣，亞女就瞓著咗，唉...又未夠鐘、Daddy又未走得，我一個人帶住呢舊肥豬仔...唯有搵間舖頭坐吓先囉！

亞女由細到大，好多時瞓著咗條利都係貼近上顎嘅，媽媽覺得好奇怪，瞓著咗條利唔係應該放鬆貼近下顎至啱架咩？？？R頭！（你哋ｄ仔女係點架，幫我留意吓再話我知啦，唔該哂！）

＊＊＊＊＊＊

一去到，未開始食火鍋亞女已經先飲為敬！

為食Wing Wing連粒冰都唔放過，激死！

Wing Wing唔肯俾爺爺抱，爺爺唯有俾ｄ糖糖佢食，（唉...明明打緊邊爐架麻，無端端食糖，激死！）

Daddy: 望吓我啦！

Wing Wing: 唔望....

Daddy: 唔望，好！等我捉實你先！

Wing Wing: 唔好呀！救我呀！

媽咪好鍾意見到Daddy同亞女玩個樣，所以係咁揸住部相機影、影、影！

＊＊＊＊＊＊

Wing Wing，你大個女喇，要乖乖喇，唔好成日喊喇，媽咪同Daddy最唔鍾意見到你成日喊架，知無！