南區尋寶

11月16日

今天是學校假期，從朋友口中得知鴨脷洲新建了一個公園，又大又靚的，心思思又想去行吓，於是相約表哥仔同DD一齊去南區....尋寶(因為大家都唔知公園名、實際地點，所以成班人真有點像去尋寶似的)

兜兜轉轉，終於搵到喇!

不過仍然唔記得睇吓個公園名~

呢度有個大嘅露天廣場，啱哂做SHOW，我哋講嘢仲有回音架，Wing Wing同DD就喺度玩回音喇!

個公園用咗造船嘅意念嚟設計，好多圍牆都好似隻船咁，仲有一部份未建成，另外亦有一個小小展覽廳，介紹一D造船工具等~

公園隔離就係海，泊滿小小艇仔，好有漁港風味~

講真，呢個公園適合較長者多過小朋友，因為我哋行勻都只係得呢度一D健體設施玩吓，係無兒童遊樂場嘅，真係估佢唔到!!

呢條跑道有400M，沿住橙色嘅跑道跑就得架喇，我哋無嘢好玩又玩吓賽跑喇~

結果就梗係表哥仔第一啦，佢真係跑得好快，犀利!

之後我哋就搭船離開，三位小朋友都係第一次搭呢款船仔，好有新鮮感!

雖然好大風，不過小朋友跑跑跳跳，真係無話過凍喎，相反我哋D大人真係要學吓...