溜冰

8月29日

去完旅行返嚟，媽咪同Wing Wing喺屋企抖吓、執吓嘢，刻意唔出街，媽媽叫佢練吓字、自己劃吓畫佢都好合作....

到咗今日星期六，夾到Daddy時間，於是一家人就開開心心再上街喇，原本無咩idea去邊，不過天氣咁熱，大家都只想去室內的地方，媽媽醒起Daddy都未見過亞女溜冰，於是食完早餐之後就出發去溜冰喇!

上次去過太古城，今次就試吓其他地方，我哋選擇去西九龍中心~

哈!大家有無留意亞女對鞋唔同咗呢，無錯，之前我哋著果對鞋著到對腳好痛，正準備提早離場之際，先聽到人哋講話可以加錢轉對軟皮嘅，咁梗係去換啦，唔通真係就咁就走咩，奇怪俾鞋我哋D職員都唔提吓D客嘅?

著咗對軟皮鞋之後真係好好多，我哋再玩多一段時間先離開，今次亞女有Daddy媽咪拖佢行，即時溜得好快，佢亦玩得好開心!

平時較少見嘅棉花糖呢度都得賣

為食樣即時現哂!