笑話

太耐無記低Wing Wing嘅笑話喇，講真，如果無呢個blog....媽媽係唔會咁積極咁去記低亞女嘅一點一滴嘅......所以一記起亞女的可愛片段，就即刻寫番低先.....

笑話(一)

有一日早上，Wing Wing自己玩緊，媽媽亦做緊家務，突然Wing Wing好似想起一d嘢咁，就大聲問媽媽....

女﹕媽咪，點解今日無偷嘢食嘅?

媽﹕(心諗...媽媽不嬲都無教佢偷嘢食喎，尋日佢又無偷嘢食，點解佢會咁問嘅呢....)

女﹕媽咪呀，點解今日無偷嘢食呀!(開始有點不耐煩)

媽﹕(唉，女呀，你攪到媽咪一舊雲咯......)

        Wing Wing,   你話咩偷嘢食呀，媽咪無教你偷嘢食喎.....

女﹕有呀，你尋日教我架....

媽﹕吓!!!!!(無喎.....)

女﹕(之後亞女指住個天....再講講吓....媽媽終於知佢想講咩喇....)

媽﹕哈哈!Wing Wing，唔係偷嘢食呀，係日全蝕呀!你係咪想講媽咪尋日教你嘅日全蝕呀?

女﹕點點頭(佢知道自己記錯咗，一副唔係咁好意思嘅樣)

日全蝕三個字...淨係記得個 '食'字...

真為食!

(二)

有一日，媽媽帶Wing Wing外出，還有一段路便到嫲嫲家，離遠亦可望到的....Wing Wing就用手指著問媽咪...

女﹕媽咪，係咪發光果度就係嫲嫲屋企呀?

媽﹕發光?邊度發光呀?(媽媽四周察看，嫲嫲大廈附近都無甚麼發光的物體....最'可疑'的亦只是停在留下的一部銀色電單車而已...)

媽﹕你係咪想話部電單車好光呀??

女﹕唔係呀!

媽﹕咁邊度發光呀?

此時我倆已行近了嫲嫲所住的大樓，Wing Wing便抬頭指着 "發光水電工程有限公司"的招牌

笑C我!!