誠實

媽媽一連3日返P，每晚都放成10點，但亞女日日都要等埋我先肯瞓，可能佢鍾意媽媽同佢講故事啩!

第一晚媽媽問佢﹕

媽﹕Wing Wing，頭先媽咪打電話番嚟，咪同你講Daddy煮緊麵嘅時候，你自己睇吓兒童聖經嘅，你有無睇到呀？

女﹕有呀，睇咗啦！

（但媽媽見到本聖經位置唔多似被人翻閱過咁，於是問多佢幾次，佢先至講話其實無睇過......）

媽媽最怕人講大話，於是就教番Wing Wing唔可以講假嘅說話，應該講真話，仲一連幾晚都同佢講有關小朋友要誠實嘅故事......

（故事內容都係離不開大人叫小朋友唔好食咁多糖，但小朋友忍唔住食咗一粒，咁當媽媽問到嘅時候，應該點講呢??）

..........

媽﹕Wing Wing，咁你估噹噹點答媽咪？

女﹕無呀，無食呀.....咁囉！

媽﹕不過佢真係有食喎，點解你會咁講嘅?

女﹕因為驚媽咪鬧呀!

媽﹕但係我哋唔可以講大話架，要講真嘅說話架，如果噹噹講大話，媽咪就會好嬲，但係如果佢講真話，同媽咪講佢真係有食，對唔住呀，媽咪就會原諒佢喇，Wing Wing你都係呀，唔洗驚媽咪鬧架，只要你知道自己唔啱，媽咪係會原諒你嘅，不過就一定唔可以講大話，天父都唔鍾意人講大話架，知唔知呀?

女﹕知道!

........

如是者，呢個故事媽咪講咗幾晚，之後佢次次都識講真話，希望佢記住，做人一定要誠誠實實，唔好講大話。